dil-awez

terā chehra mire vāste saarī duniyā ke phūloñ se afzal huā

kyā huā jo koī dūsrā

us kī ḳhushbū se mānūs ho kar use le uḌā

phuul ḳhushbū to sab ke liye ek jaise magar

un se mahzūz hote har ik shaḳhs kā

rang bhī muḳhtalif Dhang bhī muḳhtalif

tum hasīñ ho aur apnī nauiyat kī vāhid hasīñ

dil-nashīñ

be-zarar

be-takalluf sī ma.asūm sī baḳht-var

baḳht-var kyā tumheñ ilm hai

mere dil meñ banī ik imārat jise ham ne mil kar banāyā larazne lagī hai

sutūnoñ meñ ḳham aa rahā hai

mujhe is imārat ke bosīda hone kā dukh hai

aur is dukh kī bābat mirī aañkh kī putliyoñ meñ zarūrat se zyāda namī hai

mirī zindagī meñ ḳhudā kā diyā sab hai

bas ik tumhārī kamī hai

jo shāyad hamesha rahegī

tera chehra mere waste sari duniya ke phulon se afzal hua

kya hua jo koi dusra

us ki KHushbu se manus ho kar use le uDa

phul KHushbu to sab ke liye ek jaise magar

un se mahzuz hote har ek shaKHs ka

rang bhi muKHtalif Dhang bhi muKHtalif

tum hasin ho aur apni nauiyat ki wahid hasin

dil-nashin

be-zarar

be-takalluf si masum si baKHt-war

baKHt-war kya tumhein ilm hai

mere dil mein bani ek imarat jise hum ne mil kar banaya larazne lagi hai

sutunon mein KHam aa raha hai

mujhe is imarat ke bosida hone ka dukh hai

aur is dukh ki babat meri aankh ki putliyon mein zarurat se zyaada nami hai

meri zindagi mein KHuda ka diya sab hai

bas ek tumhaari kami hai

jo shayad hamesha rahegi