دل دھڑک رہا ہے

ہر لفظ جس کا مطلب محبت ہو

مجھے پسند ہے

اس کے متضاد الفاظ مجھے اچھے نہیں لگتے

ان سے خنجر تیار کئے جاتے ہیں

جن سے خوبصورتیوں کو کاٹ کر

زندگی کا عنوان بد صورتی لکھ دیا جاتا ہے

میں نفرت سے بھی نفرت کرتے ڈرتا ہوں

حالانکہ وہ نفی زندگی کا اثبات ہیں

کسی بم بلاسٹ کے بعد

سڑک پر بکھرے اعضا میں

ایک دل دھڑک رہا ہے

میں آئندہ سے مایوس نہیں

اس میں اب بھی وہ جذبہ پیدا ہو سکتا ہے

جو انسان کی خون سے رغبت کم کر دے