دل فسانہ گر

فسانہ گر ہے دل مرا

ازل سے منتظر ہے

کب سجے پھر ایک بار

دشت کہکشاں میں وہ سخن سرائیوں کی شب

سفر سے پہلے ماہتاب چھیڑ دے کوئی غزل

غزل جو گنگنانے پر نہ پوری یاد آ سکے

یہ ہجر تیز گام ہے

بدن کی سلک ڈھل رہی ہے ریت سی

یہ روشنی پگھل رہی ہے ریت سی

ستارے ریگ ریگ ہیں

یہ سبز نیلے زرد تارے گھورتے ہیں مجھ کو یوں

کہ جیسے میرے قرمزی فراق نے کیا انہیں رواں رواں

خلائیں میرے ہر طرف

خلائیں سات جہت گھومتی ہوئی

خلائیں بارشوں کی لے پہ جھومتی ہوئی

مگر خلا میں بارشیں کہاں

تو پھر یہ کیا ہے بارشوں کے شور سا

خلا کے بن میں ناچتا ہے مور سا

وہ مجھ کو میرے آئنے میں چھپ کے دیکھتا ہے کیا

دل فسانہ گر بتا دوئی کی ایکتا ہے کیا