دل مضطرب

اے دل مضطرب

اے مرے بے وفا

اے مرے بے رحم

اب ٹھہر جا ذرا

جان من

باز آ

باز آ

چاہے جانے کی خواہش میں مارا گیا

ان سرابوں کے پیچھے تو گھائل ہوا

میرے مژگاں پہ تارے ہیں بکھرے ہوئے

کون دیکھے انہیں

ہیں دیا سی ان آنکھوں میں پل پل جو پروانے مچلے ہوئے

یہ تو جل جائیں گے

خاک ہو جائیں گے

چاہے جانے کی خواہش میں مر جائیں گے

اے دل بے خبر تو نہ سہہ پائے گا

تو بھی مر جائے گا

اے مرے چارہ گر

تو کہ خود ہی مرض تو کہ خود ہی شفا

تو مسیحا بھی خود تو کہ خود ہی دوا

اے دل بے خبر

چاہے جانے کی سب شدتوں کو گھٹا

باز آ باز آ