dil-e-nadan

gar āsmāñ ko mahr-e-daraḳhshāñ pe naaz hai

anjum pe naaz hai mah-e-tābāñ pe naaz hai

gulshan ko apne sumbul-o-raihāñ pe naaz hai

aur bāġhbāñ ko apne gulistāñ pe naaz hai

shāḳhoñ ko andalīb ke naġhmoñ pe naaz hai

aur andalīb ko gul-e-ḳhandāñ pe naaz hai

sabza ko apne gauhar-e-larzāñ pe naaz hai

sahn-e-chaman ko husn-e-ḳhirāmāñ pe naaz hai

shā.ir ko apne husn-e-liyāqat pe naaz hai

āshiq ko apne sīna-e-biryāñ pe naaz hai

ashkoñ ko garche apnī ravānī pe naaz hai

aahoñ ko apnī ātish-e-sozāñ pe naaz hai

mansūr-e-pāk-bāz ko dār-o-rasan pe naaz

majnūñ ko apne chāk-e-garebāñ pe naaz hai

zauq-e-fanā pe naaz hai garche patang ko

mahfil ko apnī sham-e-farozāñ pe naaz hai

isyāñ ko garche rahmat-e-yazdāñ pe naaz hai

rahmat ko afv-e-kasrat-e-isyāñ pe naaz hai

apnī balā se gar koī nāzāñ ḳhirad pe ho

ham ko to ai 'purī' dil-e-nādāñ pe naaz hai

gar aasman ko mahr-e-daraKHshan pe naz hai

anjum pe naz hai mah-e-taban pe naz hai

gulshan ko apne sumbul-o-raihan pe naz hai

aur baghban ko apne gulistan pe naz hai

shaKHon ko andalib ke naghmon pe naz hai

aur andalib ko gul-e-KHandan pe naz hai

sabza ko apne gauhar-e-larzan pe naz hai

sahn-e-chaman ko husn-e-KHiraman pe naz hai

shair ko apne husn-e-liyaqat pe naz hai

aashiq ko apne sina-e-biryan pe naz hai

ashkon ko garche apni rawani pe naz hai

aahon ko apni aatish-e-sozan pe naz hai

mansur-e-pak-baz ko dar-o-rasan pe naz

majnun ko apne chaak-e-gareban pe naz hai

zauq-e-fana pe naz hai garche patang ko

mahfil ko apni sham-e-farozan pe naz hai

isyan ko garche rahmat-e-yazdan pe naz hai

rahmat ko afw-e-kasrat-e-isyan pe naz hai

apni bala se gar koi nazan KHirad pe ho

hum ko to ai 'puri' dil-e-nadan pe naz hai