دل ناداں

گر آسماں کو مہر درخشاں پہ ناز ہے

انجم پہ ناز ہے مہ تاباں پہ ناز ہے

گلشن کو اپنے سنبل و ریحاں پہ ناز ہے

اور باغباں کو اپنے گلستاں پہ ناز ہے

شاخوں کو عندلیب کے نغموں پہ ناز ہے

اور عندلیب کو گل خنداں پہ ناز ہے

سبزہ کو اپنے گوہر لرزاں پہ ناز ہے

صحن‌ چمن کو حسن خراماں پہ ناز ہے

شاعر کو اپنے حسن لیاقت پہ ناز ہے

عاشق کو اپنے سینہ بریاں پہ ناز ہے

اشکوں کو گرچہ اپنی روانی پہ ناز ہے

آہوں کو اپنی آتش سوزاں پہ ناز ہے

منصور پاکباز کو دار و رسن پہ ناز

مجنوں کو اپنے چاک گریباں پہ ناز ہے

ذوق فنا پہ ناز ہے گرچہ پتنگ کو

محفل کو اپنی شمع فروزاں پہ ناز ہے

عصیاں کو گرچہ رحمت یزداں پہ ناز ہے

رحمت کو عفو کثرت عصیاں پہ ناز ہے

اپنی بلا سے گر کوئی نازاں خرد پہ ہو

ہم کو تو اے پوریؔ دل ناداں پہ ناز ہے