dil-e-pur-KHun

dil bahut dukhtā hai har baat pe dil dukhtā hai

sub.h-e-nau-ḳhez pe sūraj kī jahāñbānī pe

shām-e-dil-doz pe anjām-e-gul-andāmī pe

aks-e-maujūd pe

anvār-e-ruḳh-e-zebā pe

naqsh-e-mauhūm pe aḳhaf-e-dil-e-fardā pe

bast-e-aflāk pe afsāna-e-ra.anā.ī pe

sharh-e-nairañgī-e-hastī-o-zuleḳhā.ī pe

raat ke soz pe shāmoñ ke mahak jaane pe

hiddat-e-shauq meñ kaliyoñ ke chaTaḳh jaane pe

muzmahil tāroñ pe sahme hue aivānoñ pe

qahva-ḳhānoñ meñ jam.a shahar ke dīvānoñ pe

riñd-e-maḳhmūr-o-balā-nosh pe parvānoñ meñ

sham-e-kushta pe ujḌe hue insānoñ pe

ārzūoñ kī subuk-sārī pe arzānī pe

dil shafaq rañg pe jazboñ kī farāvānī pe

husn-e-ḳhud-ārā-o-ḳhud-bīñ kī dil-ārā.ī pe

ishq-e-maḳhmūr kī jāñ-sozī-o-tanhā.ī pe

pahlū-e-dil se kahīñ lag ke koī rotā hai

dast-e-qātil pe kahīñ ashk kahīñ dhabbe haiñ

dil masaltā hai koī haath meñ le kar har dam

dil bahut dukhtā hai har baat pe dil dukhtā hai

dil bahut dukhta hai har baat pe dil dukhta hai

subh-e-nau-KHez pe suraj ki jahanbani pe

sham-e-dil-doz pe anjam-e-gul-andami pe

aks-e-maujud pe

anwar-e-ruKH-e-zeba pe

naqsh-e-mauhum pe aKHaf-e-dil-e-farda pe

bast-e-aflak pe afsana-e-ranai pe

sharh-e-nairangi-e-hasti-o-zuleKHai pe

raat ke soz pe shamon ke mahak jaane pe

hiddat-e-shauq mein kaliyon ke chaTaKH jaane pe

muzmahil taron pe sahme hue aiwanon pe

qahwa-KHanon mein jama shahar ke diwanon pe

rind-e-maKHmur-o-bala-nosh pe parwanon mein

sham-e-kushta pe ujDe hue insanon pe

aarzuon ki subuk-sari pe arzani pe

dil shafaq rang pe jazbon ki farawani pe

husn-e-KHud-ara-o-KHud-bin ki dil-arai pe

ishq-e-maKHmur ki jaan-sozi-o-tanhai pe

pahlu-e-dil se kahin lag ke koi rota hai

dast-e-qatil pe kahin ashk kahin dhabbe hain

dil masalta hai koi hath mein le kar har dam

dil bahut dukhta hai har baat pe dil dukhta hai