dil-e-viran

samajhte kyā ho tum dil ko

bil-āḳhir kyā samajhte ho

kabhī kahte ho patthar hai

tarāsho ḳhuub nikhregā

kabhī shīsha samajhte ho

jo āñdhī ne bikherā ho

siyah vo raaz sadiyoñ ke

isī dil meñ chhupāte ho

kabhī murda sī yādoñ ko

bhī siine meñ dabāte ho

maiñ aksar farz kartī huuñ

maiñ jo tum se agar kah duuñ

ki dil meñ koī bastā hai

nigāhoñ meñ utartā hai

bahāroñ meñ sañvartā hai

vo dil ko ghar batātā hai

vo ghar meñ but banātā hai

vo ḳhud kā aks chintā hai

vo dil ko chaak kartā hai

maiñ us kī kārsāzī meñ

ḳhamoshī se taḌaptī huuñ

use apnā batāne ke

amal ko phir jhapaTtī huuñ

duā kartī huuñ qudrat se

ki jis ne ghar banāyā thā

jise ghar kā makīñ jaanā

use mehmān kar de to

to qudrat phir mire hāthoñ

ko kuchh auzār detī hai

maiñ apne aap hī is dil

ke ghar ko noch detī huuñ

tumheñ ma.alūm hai kitnī

maiñ ab taklīf sahtī huuñ

ki jab dīvār ko ghar kī

maiñ ḳhud hī saaf kartī huuñ

maiñ aksar farz kartī huuñ

maiñ jo tum se agar kah duuñ

ki dil meñ ab nahīñ koī

ye dil banjar zamīñ koī

to kyā tum phir bhī aaoge

to kyā dil ko sañvāroge

samajhte kya ho tum dil ko

bil-aKHir kya samajhte ho

kabhi kahte ho patthar hai

tarasho KHub nikhrega

kabhi shisha samajhte ho

jo aandhi ne bikhera ho

siyah wo raaz sadiyon ke

isi dil mein chhupate ho

kabhi murda si yaadon ko

bhi sine mein dabaate ho

main aksar farz karti hun

main jo tum se agar kah dun

ki dil mein koi basta hai

nigahon mein utarta hai

bahaaron mein sanwarta hai

wo dil ko ghar batata hai

wo ghar mein but banata hai

wo KHud ka aks chinta hai

wo dil ko chaak karta hai

main us ki karsazi mein

KHamoshi se taDapti hun

use apna batane ke

amal ko phir jhapaTti hun

dua karti hun qudrat se

ki jis ne ghar banaya tha

jise ghar ka makin jaana

use mehman kar de to

to qudrat phir mere hathon

ko kuchh auzar deti hai

main apne aap hi is dil

ke ghar ko noch deti hun

tumhein malum hai kitni

main ab taklif sahti hun

ki jab diwar ko ghar ki

main KHud hi saf karti hun

main aksar farz karti hun

main jo tum se agar kah dun

ki dil mein ab nahin koi

ye dil banjar zamin koi

to kya tum phir bhi aaoge

to kya dil ko sanwaroge