دل یاس خو

یہ صبح اب بھی ہے اتنی رنگیں

اسی لگن سے لطیف کرنوں کا جال اب بھی

بچھا رہا ہے حسین سورج

لٹا رہی ہے

یہ سندھیا اب بھی سیندور ہر سو

یہ چاند اب بھی مٹھاس دھرتی کو دے رہا ہے

بکھیرتے ہیں شمیم دلکش نسیم کے جاں نواز جھونکے

وشال آکاش میں دھنک کی ضیا کا جادو نکھر گیا ہے

مگر یہ سارے مناظر دل فریب میرے اتھاہ غم کو مٹا نہ پائے

اداس ہیں ذہن و قلب اور یاس ایک بندھن سا بن گئی ہے

کہ بجھ گئی ہیں وفا کی شمعیں

اداس دن ہیں اداس راتیں

ہو جس طرح کوئی تیرہ جنگل

کہ جس کا سناٹا دل کے ڈسنے کو سر اٹھائے