dil mere sahra-naward-e-pir dil

naġhma-dar-jāñ raqs barpā ḳhanda-bar-lab

dil tamannāoñ ke be-pāyāñ alaav ke qarīb

dil mire sahrā-navard-e-pīr dil

reg ke dil-shād shahrī reg tū

aur reg hī terī talab

reg kī nik.hat tire paikar meñ terī jaañ meñ hai

reg sub.h-e-īd ke mānind zartāb-o-jalīl

reg sadiyoñ kā jamāl

jashn-e-ādam par bichhaḌ kar milne vāloñ kā visāl

shauq ke lamhāt ke mānind āzād-o-azīm

reg naġhma-zan

ki zarre reg-zāroñ kī vo pāzeb-e-qadīm

jis pe paḌ saktā nahīñ dast-e-la.īm

reg-e-sahrā zar-garī kī ek kī lahroñ se duur

chashma-e-makr-o-riyā shahroñ se duur

reg shab-bedār hai suntī hai har jābir kī chaap

reg shab-bedār hai nigarāñ hai mānind-e-naqīb

dekhtī hai sāya-e-āmir kī chaap

reg har ayyār ġhārat-gar kī maut

reg istibdād ke tuġhyāñ ke shor-o-shar kī maut

reg jab uThtī hai uḌ jaatī hai har fāteh kī niiñd

reg ke nezoñ se zaḳhmī sab shahanshāhoñ ke ḳhvāb

reg ai sahrā kī reg

mujh ko apne jāgte zarroñ ke ḳhvāboñ kī

na.ī ta.abīr de

reg ke zarroñ ubhartī sub.h tum

aao sahrā kī hadoñ tak aa gayā roz-e-tarab

dil mire sahrā-navard-e-pīr dil

aa chuum reg

hai ḳhayāloñ ke parī-zādoñ se bhī ma.asūm reg

reg-e-raqsāñ māh-o-sāl nuur tak raqsāñ rahe

us kā abresham mulā.em narm-ḳhū ḳhandāñ rahe

dil mire sahrā-navard-e-pīr dil

ye tamannāoñ kā be-pāyāñ alaav

raah gum kar duuñ kī mash.al is ke lab par aao aao

tere maazī ke ḳhazaf rezoñ se jaagī hai ye aag

aag kī qurmuz zabāñ par imbisāt-e-nau ke raag

dil mire sahrā-navard-e-pīr dil

sargirānī kī shab-e-rafta se jaag

kuchh sharar āġhosh sarsar meñ haiñ gum

aur kuchh ziina ba ziina sho.aloñ ke mīnār par chaḌhte hue

aur kuchh tah meñ alaav kī abhī

muztarib lekin muzabzab tifl-e-kam-sin kī tarah

aag ziina aag rañgoñ kā ḳhazīna

aag un lazzāt kā sar-chashma hai

jis se letā hai ġhizā ushshāq ke dil kā tapāk

chob-e-ḳhushk añgūr us kī mai hai aag

sarsarātī hai ragoñ meñ iid ke din kī tarah

aag kāhin yaad se utrī huī sadiyoñ kī ye afsāna-ḳhvāñ

aane vaale qarnahā kī dāstāneñ lab pe haiñ

dil mirā sahrā-navard-e-pīr dil sun kar javāñ

aag āzādī kā dil-shādī kā naam

aag paidā.ish kā afzā.ish kā naam

aag ke phūloñ meñ nasrīñ yāsman sumbul shafīq-o-nastaran

aag ārā.ish kā zebā.ish kā naam

aag vo taqdīs dhul jaate haiñ jis se sab gunāh

aag insānoñ kī pahlī saañs ke mānind ik aisā karam

umr kā ik tuul bhī jis kā nahīñ kaafī javāb

ye tamannāoñ kā be-pāyāñ alaav gar na ho

is laq-o-daq meñ nikal aa.eñ kahīñ se bheḌiye

is alaav ko sadā raushan rakho

reg-e-sahrā ko bashārat ho ki zinda hai alaav

bheḌiyoñ kī chaap tak aatī nahīñ

aag se sahrā kā rishta hai qadīm

aag se sahrā ke TeḌhe reñgne vaale

girah-ālūd zholīda daraḳht

jāgte haiñ naġhma-dar-jāñ raqs barpā ḳhanda-bar-lab

aur manā lete haiñ tanhā.ī meñ jashn-e-māhtāb

un kī shāḳheñ ġhair-mara.ī tabl kī āvāz par detī haiñ taal

bīkH-o-bun se aane lagtī hai ḳhudāvandī jalājil kī sadā

aag se sahrā kā rishta hai qadīm

rahravoñ sahrā-navardoñ ke liye hai rahnumā

kārvānoñ kā sahārā bhī hai aag

aur sahrāoñ kī tanhā.ī ko kam kartī hai aag

aag ke chāroñ taraf pashmīna-o-dastār meñ lipTe hue

afsāna-go

jaise gird-e-chashm mizhgāñ kā hujūm

un ke hairat-nāk dilkash tajraboñ se

jab damak uThtī hai ret

zarra zarra bajne lagtā hai misāl-e-sāz-e-jāñ

gosh-bar-āvāz rahte haiñ daraḳht

aur hañs dete haiñ apnī ārifāna be-niyāzī se kabhī

ye tamannāoñ kā be-pāyāñ alaav gar na ho

reg apnī ḳhalvat-e-be-nūr-o-ḳhud-bīñ meñ rahe

apnī yaktā.ī kī tahsīñ meñ rahe

is alaav ko sadā raushan rakho

ye tamannāoñ kā be-pāyāñ alaav gar na ho

asia africa pahnā.ī kā naam

be-kār pahnā.ī kā naam

europe aur america dārā.ī kā naam

takrār-e-dārā.ī kā naam

merā dil sahrā-navard-e-pīr dil

jaag uThā hai mashriq-o-maġhrib kī aisī yak-dilī

ke kārvānoñ kā nayā ruuyā liye

yak-dilī aisī ki hogī fahm-e-insāñ se varā

yak-dilī aisī ki ham sab kah uTheñ

is qadar ujlat na kar

izhdihām-e-gul na ban

kah uTheñ ham

tū ġham-e-kul to na thī

ab lazzat-e-kul bhī na ban

roz-e-āsā.ish kī bedardī na ban

yak-dilī ban aisā sannāTā na ban

jis meñ tābistāñ kī dopahroñ kī

be-hāsil kasālat ke sivā kuchh bhī na ho

is jafā-gar yak-dilī ke kārvāñ yuuñ ā.eñge

dast-e-jādū-gar se jaise phuuT nikle hoñ tilism

ishq-e-hāsil-ḳhez se yā zor-e-paidā.ī se jaise nā-gahāñ

khul ga.e hoñ mashriq-o-maġhrib ke jism

jism sadiyoñ ke aqiim

kārvāñ farḳhanda-pai aur un kā baar

kiisa kiisa taḳht-e-jam aur tāj-e-kai

kuuza kuuza fard kī satvat kī mai

jaama jaama roz-o-shab mehnat kā ḳhai

naġhma naġhma hurriyat kī garm lai

sāliko firoz-baḳhto aane vaale qāflo

shahr se lauToge tum to pāoge

ret ke sarhad pe jo rūh-e-abad ḳhvābīda thī

jaag uThī hai shikva-hā-e-nai se vo

ret kī tah meñ jo sharmīlī sahar roīda thī

jaag uThī hai hurriyat kī lai se vo

itnī doshīza thī itnī mard-e-nā-dīda thī sub.h

pūchh sakte the na us kī umr ham

dard se hañstī na thī

zarroñ kī ra.anā.ī pe bhī hañstī na thī

ek mahjūbāna be-ḳhabarī meñ hañs detī thī sub.h

ab manātī hai vo sahrā kā jalāl

jaise izz-o-jal ke paañv kī yahī mehrāb ho

zer-e-mehrāb aa ga.ī ho us ko bedārī kī raat

ḳhud janāb-e-izz-o-jal se jaise umīd-e-zafāf

saare nā-karda gunāh is ke muaaf

sub.h-e-sahrā shād-bād

ai urūs-e-izz-o-jal farḳhanda ro tābinda kho

tū ik aise hujra-e-shab se nikal kar aa.ī hai

dast-e-qātil ne bahāyā thā jahāñ har sej par

saiñkaḌoñ tāroñ kā raḳhshanda lahū phūloñ ke paas

sub.h-e-sahrā sar mire zaanū pe rakh kar dāstāñ

un tamannā ke shahīdoñ kī na kah

un kī nīma-ras umañgoñ ārzūoñ kī na kah

jin se milne kā koī imkāñ nahīñ

shahd terā jin ko nashsh-e-jāñ nahīñ

aaj bhī kuchh duur is sahrā ke paar

dev kī dīvār ke nīche nasīm

roz-o-shab chaltī hai mub.ham ḳhauf se sahmī huī

jis tarah shahroñ kī rāhoñ par yatīm

naġhma-bar-lab taaki un kī jaañ kā sannāTā ho duur

aaj bhī is reg ke zarroñ meñ haiñ

aise zarre aap hī apne ġhanīm

aaj bhī is aag ke sho.aloñ meñ haiñ

vo sharar jo us kī tah meñ par-burīda rah ga.e

misl-e-harf nā-shunīda rah ga.e

sub.h-e-sahrā ai urūs-e-izz-o-jal

aa ki un kī dāstāñ dohrā.eñ ham

un kī izzat un kī azmat gaa.eñ ham

sub.h ret aur aag ham sab kā jalāl

yak-dilī ke kārvāñ un kā jamāl

aao

is tahlīl ke halqe meñ ham mil jaa.eñ

aao

shād-bāġh apnī tamannāoñ kā be-pāyāñ alaav

naghma-dar-jaan raqs barpa KHanda-bar-lab

dil tamannaon ke be-payan alaw ke qarib

dil mere sahra-naward-e-pir dil

reg ke dil-shad shahri reg tu

aur reg hi teri talab

reg ki nikhat tere paikar mein teri jaan mein hai

reg subh-e-id ke manind zartab-o-jalil

reg sadiyon ka jamal

jashn-e-adam par bichhaD kar milne walon ka visal

shauq ke lamhat ke manind aazad-o-azim

reg naghma-zan

ki zarre reg-zaron ki wo pazeb-e-qadim

jis pe paD sakta nahin dast-e-laim

reg-e-sahra zar-gari ki ek ki lahron se dur

chashma-e-makr-o-riya shahron se dur

reg shab-bedar hai sunti hai har jabir ki chap

reg shab-bedar hai nigaran hai manind-e-naqib

dekhti hai saya-e-amir ki chap

reg har ayyar ghaarat-gar ki maut

reg istibdad ke tughyan ke shor-o-shar ki maut

reg jab uThti hai uD jati hai har fateh ki nind

reg ke nezon se zaKHmi sab shahanshahon ke KHwab

reg ai sahra ki reg

mujh ko apne jagte zarron ke KHwabon ki

nai tabir de

reg ke zarron ubharti subh tum

aao sahra ki hadon tak aa gaya roz-e-tarab

dil mere sahra-naward-e-pir dil

aa chum reg

hai KHayalon ke pari-zadon se bhi masum reg

reg-e-raqsan mah-o-sal nur tak raqsan rahe

us ka abresham mulaem narm-KHu KHandan rahe

dil mere sahra-naward-e-pir dil

ye tamannaon ka be-payan alaw

rah gum kar dun ki mashal is ke lab par aao aao

tere mazi ke KHazaf rezon se jagi hai ye aag

aag ki qurmuz zaban par imbisat-e-nau ke rag

dil mere sahra-naward-e-pir dil

sargirani ki shab-e-rafta se jag

kuchh sharar aaghosh sarsar mein hain gum

aur kuchh zina ba zina shoalon ke minar par chaDhte hue

aur kuchh tah mein alaw ki abhi

muztarib lekin muzabzab tifl-e-kam-sin ki tarah

aag zina aag rangon ka KHazina

aag un lazzat ka sar-chashma hai

jis se leta hai ghiza ushshaq ke dil ka tapak

chob-e-KHushk angur us ki mai hai aag

sarsaraati hai ragon mein id ke din ki tarah

aag kahin yaad se utri hui sadiyon ki ye afsana-KHwan

aane wale qarnaha ki dastanen lab pe hain

dil mera sahra-naward-e-pir dil sun kar jawan

aag aazadi ka dil-shadi ka nam

aag paidaish ka afzaish ka nam

aag ke phulon mein nasrin yasman sumbul shafiq-o-nastaran

aag aaraish ka zebaish ka nam

aag wo taqdis dhul jate hain jis se sab gunah

aag insanon ki pahli sans ke manind ek aisa karam

umr ka ek tul bhi jis ka nahin kafi jawab

ye tamannaon ka be-payan alaw gar na ho

is laq-o-daq mein nikal aaen kahin se bheDiye

is alaw ko sada raushan rakho

reg-e-sahra ko bashaarat ho ki zinda hai alaw

bheDiyon ki chap tak aati nahin

aag se sahra ka rishta hai qadim

aag se sahra ke TeDhe rengne wale

girah-alud zholida daraKHt

jagte hain naghma-dar-jaan raqs barpa KHanda-bar-lab

aur mana lete hain tanhai mein jashn-e-mahtab

un ki shaKHen ghair-marai tabl ki aawaz par deti hain tal

bikH-o-bun se aane lagti hai KHudawandi jalajil ki sada

aag se sahra ka rishta hai qadim

rahrawon sahra-nawardon ke liye hai rahnuma

karwanon ka sahaara bhi hai aag

aur sahraon ki tanhai ko kam karti hai aag

aag ke chaaron taraf pashmina-o-dastar mein lipTe hue

afsana-go

jaise gird-e-chashm mizhgan ka hujum

un ke hairat-nak dilkash tajrabon se

jab damak uThti hai ret

zarra zarra bajne lagta hai misal-e-saz-e-jaan

gosh-bar-awaz rahte hain daraKHt

aur hans dete hain apni aarifana be-niyazi se kabhi

ye tamannaon ka be-payan alaw gar na ho

reg apni KHalwat-e-be-nur-o-KHud-bin mein rahe

apni yaktai ki tahsin mein rahe

is alaw ko sada raushan rakho

ye tamannaon ka be-payan alaw gar na ho

asia africa pahnai ka nam

be-kar pahnai ka nam

europe aur america darai ka nam

takrar-e-darai ka nam

mera dil sahra-naward-e-pir dil

jag uTha hai mashriq-o-maghrib ki aisi yak-dili

ke karwanon ka naya ruya liye

yak-dili aisi ki hogi fahm-e-insan se wara

yak-dili aisi ki hum sab kah uThen

is qadar ujlat na kar

izhdiham-e-gul na ban

kah uThen hum

tu gham-e-kul to na thi

ab lazzat-e-kul bhi na ban

roz-e-asaish ki bedardi na ban

yak-dili ban aisa sannaTa na ban

jis mein tabistan ki dopahron ki

be-hasil kasalat ke siwa kuchh bhi na ho

is jafa-gar yak-dili ke karwan yun aaenge

dast-e-jadu-gar se jaise phuT nikle hon tilism

ishq-e-hasil-KHez se ya zor-e-paidai se jaise na-gahan

khul gae hon mashriq-o-maghrib ke jism

jism sadiyon ke aqim

karwan farKHanda-pai aur un ka bar

kisa kisa taKHt-e-jam aur taj-e-kai

kuza kuza fard ki satwat ki mai

jama jama roz-o-shab mehnat ka KHai

naghma naghma hurriyat ki garm lai

saliko firoz-baKHto aane wale qaflo

shahr se lauToge tum to paoge

ret ke sarhad pe jo ruh-e-abad KHwabida thi

jag uThi hai shikwa-ha-e-nai se wo

ret ki tah mein jo sharmili sahar roida thi

jag uThi hai hurriyat ki lai se wo

itni doshiza thi itni mard-e-na-dida thi subh

puchh sakte the na us ki umr hum

dard se hansti na thi

zarron ki ranai pe bhi hansti na thi

ek mahjubana be-KHabari mein hans deti thi subh

ab manati hai wo sahra ka jalal

jaise izz-o-jal ke panw ki yahi mehrab ho

zer-e-mehrab aa gai ho us ko bedari ki raat

KHud janab-e-izz-o-jal se jaise umid-e-zafaf

sare na-karda gunah is ke muaf

subh-e-sahra shad-baad

ai urus-e-izz-o-jal farKHanda ro tabinda kho

tu ek aise hujra-e-shab se nikal kar aai hai

dast-e-qatil ne bahaya tha jahan har sej par

sainkaDon taron ka raKHshanda lahu phulon ke pas

subh-e-sahra sar mere zanu pe rakh kar dastan

un tamanna ke shahidon ki na kah

un ki nima-ras umangon aarzuon ki na kah

jin se milne ka koi imkan nahin

shahd tera jin ko nashsh-e-jaan nahin

aaj bhi kuchh dur is sahra ke par

dew ki diwar ke niche nasim

roz-o-shab chalti hai mubham KHauf se sahmi hui

jis tarah shahron ki rahon par yatim

naghma-bar-lab taki un ki jaan ka sannaTa ho dur

aaj bhi is reg ke zarron mein hain

aise zarre aap hi apne ghanim

aaj bhi is aag ke shoalon mein hain

wo sharar jo us ki tah mein par-burida rah gae

misl-e-harf na-shunida rah gae

subh-e-sahra ai urus-e-izz-o-jal

aa ki un ki dastan dohraen hum

un ki izzat un ki azmat gaen hum

subh ret aur aag hum sab ka jalal

yak-dili ke karwan un ka jamal

aao

is tahlil ke halqe mein hum mil jaen

aao

shad-bagh apni tamannaon ka be-payan alaw