dilli ki ek sham

farq kuchh bhī nahīñ

chāhe kisī bhī samt chalūñ

shahr kā dasht ghanā aur ghanā hotā hai

nīm-tārīk galī

jis meñ lagā ik khambā

zardī-e-ḳhās se rangtā hai galī ke kankar

jhuk gayā hai jo kisī pīr-e-ḳhamīda kī tarah

dam-ba-dam jal ke bujhā

bujh ke jalā

kyā kahiye

bas yahī shai hai jise shahr kā jugnū kah duuñ

sochtā huuñ maiñ kabhī yuuñ bhī ki is duniyā meñ

be-ma.ānī hai

mirā vajd meñ aa jaanā bhī

be-ma.ānī hai

ma.ānī kī tavaqqo' karnā

ek jangal hai ki jis meñ mire aa jaane se

farq kuchh bhī nahīñ

chāhe koī bhī raah chunūñ

ye jagah bhuul bhulaiyā hai

magar rastoñ se

maiñ bhī mānūs huuñ

duniyā bhī hai

sab log bhī haiñ

aur ik lamhā-e-be-sūd ko jiine ke liye

sabhī koshāñ haiñ

sabhī jī rahe haiñ jiine ko

aur maiñ bhiiḌ meñ tanhā huuñ

Thagā sā

phir bhī

aaj maiñ bhī huuñ isī bhiiḌ kā hissa bhar

bas

maiñ savāloñ se aqīdoñ pe luḌhak aaya huuñ

dhuñdh hai zehn meñ

pastī kā mujassam hai badan

koī āvāz-e-nihāñ

mujh se dobārā na kahe

jaag kar bhī na uThe bistar-e-duniyā se kyoñ

tum ma.ānī ke musāfir the

musāfir hī to the

farq kuchh bhi nahin

chahe kisi bhi samt chalun

shahr ka dasht ghana aur ghana hota hai

nim-tarik gali

jis mein laga ek khamba

zardi-e-KHas se rangta hai gali ke kankar

jhuk gaya hai jo kisi pir-e-KHamida ki tarah

dam-ba-dam jal ke bujha

bujh ke jala

kya kahiye

bas yahi shai hai jise shahr ka jugnu kah dun

sochta hun main kabhi yun bhi ki is duniya mein

be-maani hai

mera wajd mein aa jaana bhi

be-maani hai

maani ki tawaqqo' karna

ek jangal hai ki jis mein mere aa jaane se

farq kuchh bhi nahin

chahe koi bhi rah chunun

ye jagah bhul bhulaiya hai

magar raston se

main bhi manus hun

duniya bhi hai

sab log bhi hain

aur ek lamha-e-be-sud ko jine ke liye

sabhi koshan hain

sabhi ji rahe hain jine ko

aur main bhiD mein tanha hun

Thaga sa

phir bhi

aaj main bhi hun isi bhiD ka hissa bhar

bas

main sawalon se aqidon pe luDhak aaya hun

dhundh hai zehn mein

pasti ka mujassam hai badan

koi aawaz-e-nihan

mujh se dobara na kahe

jag kar bhi na uThe bistar-e-duniya se kyon

tum maani ke musafir the

musafir hi to the