dilli mein hain

aah kyā kyā āj-kal rañgīniyāñ dehlī meñ haiñ

rāstoñ par chaltī-phirtī bijliyāñ dehlī meñ haiñ

ḳhuld kī hūreñ bhī sharmātī haiñ jin ke husn se

āj-kal un mah-vashoñ ke kārvāñ dehlī meñ haiñ

halke-phulke āñchaloñ meñ naujavānī kā ubhār

raqs karte gungunāte gulistāñ dehlī meñ haiñ

aadmī kyā haiñ farishte bhī jinheñ sajda kareñ

in dinoñ raqsinda vo sarv-e-ravāñ dehlī meñ haiñ

mai-kashoñ ko nashsha ho jaatā hai be-jām-o-subū

husn kī vo dil-fareb añgḌā.iyāñ dehlī meñ haiñ

koī gul hai koī ġhuncha hai gulistāñ hai koī

har taraf gul-bāriyāñ gul-kāriyāñ dehlī meñ haiñ

koī mai-ḳhāna koī saaqī koī jām-e-sharāb

har taraf bad-mastiyāñ be-hoshiyāñ dehlī meñ haiñ

dar-haqīqat āj-kal ye shahr hai indar-prasth

vo hasīñ hūreñ vo sundar deviyāñ dehlī meñ haiñ

naġhma-ārā vādiyoñ meñ haiñ nujūm-o-mehr-o-māh

husn kī chhā.ī huī barnā.iyāñ dehlī meñ haiñ

aur inhīñ barnā.iyoñ ke saath ai ham-rāz-e-jāñ

kis qadar sahmī huī sī talḳhiyāñ dehlī meñ haiñ

aur inhīñ naġhmoñ ke saath ai mutrib-e-afsūñ-nigār

kis qadar sākit laboñ par hichkiyāñ dehlī meñ haiñ

āj-kal dehlī meñ kyā kyā hai na pūchh ai ham-nafas

choriyāñ haiñ rishvateñ haiñ pagḌiyāñ dehlī meñ haiñ

jo ba-zāhir but-shikan haiñ aur ba-bātin but-tarāsh

ḳhūbī-e-taqdīr se vo mehrbāñ dehlī meñ haiñ

ek doshīza kī qīmat ek roTī ho ga.ī

kis qadar ai dost anqā roTiyāñ dehlī meñ haiñ

koī kar saktā nahīñ firqa-parastoñ kī shanāḳht

ek do kyā Toliyoñ kī Toliyāñ dehlī meñ haiñ

bojh se jin ke pahāḌoñ ke laraz uThte haiñ dil

zindagī ke vo bhayānak imtihāñ dehlī meñ haiñ

jail ke tārīk kamroñ meñ jo rahte the kabhī

aaj bhī vo kāmiyāb-o-kāmrāñ dehlī meñ haiñ

koī suntā hī nahīñ ahl-e-mohabbat kī pukār

har taraf kuchh ajnabī sī boliyāñ dehlī meñ haiñ

ḳhuun ro haañ ḳhuun rotā hashr is adbār par

vo purāne taur ai dil ab kahāñ dehlī meñ haiñ

aah kya kya aaj-kal ranginiyan dehli mein hain

raston par chalti-phirti bijliyan dehli mein hain

KHuld ki huren bhi sharmati hain jin ke husn se

aaj-kal un mah-washon ke karwan dehli mein hain

halke-phulke aanchalon mein naujawani ka ubhaar

raqs karte gungunate gulistan dehli mein hain

aadmi kya hain farishte bhi jinhen sajda karen

in dinon raqsinda wo sarw-e-rawan dehli mein hain

mai-kashon ko nashsha ho jata hai be-jam-o-subu

husn ki wo dil-fareb angDaiyan dehli mein hain

koi gul hai koi ghuncha hai gulistan hai koi

har taraf gul-bariyan gul-kariyan dehli mein hain

koi mai-KHana koi saqi koi jam-e-sharab

har taraf bad-mastiyan be-hoshiyan dehli mein hain

dar-haqiqat aaj-kal ye shahr hai indar-prasth

wo hasin huren wo sundar dewiyan dehli mein hain

naghma-ara wadiyon mein hain nujum-o-mehr-o-mah

husn ki chhai hui barnaiyan dehli mein hain

aur inhin barnaiyon ke sath ai ham-raaz-e-jaan

kis qadar sahmi hui si talKHiyan dehli mein hain

aur inhin naghmon ke sath ai mutrib-e-afsun-nigar

kis qadar sakit labon par hichkiyan dehli mein hain

aaj-kal dehli mein kya kya hai na puchh ai ham-nafas

choriyan hain rishwaten hain pagDiyan dehli mein hain

jo ba-zahir but-shikan hain aur ba-baatin but-tarash

KHubi-e-taqdir se wo mehrban dehli mein hain

ek doshiza ki qimat ek roTi ho gai

kis qadar ai dost anqa roTiyan dehli mein hain

koi kar sakta nahin firqa-paraston ki shanaKHt

ek do kya Toliyon ki Toliyan dehli mein hain

bojh se jin ke pahaDon ke laraz uThte hain dil

zindagi ke wo bhayanak imtihan dehli mein hain

jail ke tarik kamron mein jo rahte the kabhi

aaj bhi wo kaamiyab-o-kaamran dehli mein hain

koi sunta hi nahin ahl-e-mohabbat ki pukar

har taraf kuchh ajnabi si boliyan dehli mein hain

KHun ro han KHun rota hashr is adbar par

wo purane taur ai dil ab kahan dehli mein hain