dilli

ye dillī hai

ye pahlī baar pāñDav ne basā.ī thī

ise dekhā to duryodhan hasad se khaul uThā thā

yahīñ vo sher-dil chauhān rahtā thā

jise āvāz par apnā nishāna dāġhne kā kashf aatā thā

nizāmuddīm se rūhāniyat kā dars le kar

vajd-e-ḳhusrav ne isī ke giit gaa.e the

humāyūñ ne isī kī ḳhaak meñ ḳhud ko milāyā thā

isī ke dil kī nāzuk dhaḌkanoñ ko 'mīr'-o-'ġhālib' ne zabāñ dī thī

ye apnī zaat meñ ik muḳhtasar hindostāñ ya.anī

ye rohīloñ kī nādir shaah kī rauñdī huī dillī

ik aisā shahr hai jo bārhā ujḌā magar jis ne

kabhī apnī adā-e-dil-navāzī ko nahīñ chhoḌā

ise taḳhrīb ke har vaar ne ta.amīr kā irfān baḳhshā hai

yahāñ har zulm karne vaalā āḳhir muñh kī khātā hai

ye har vaqt ek albelī dulhan kī misl

apnī maañg meñ sindūr bhar kar muntazir rahtī hai har āzurda-ḳhātir kī

yahāñ har sāhib-e-dil aa ke jaanā bhuul jaatā hai

ye dilli hai

ye pahli bar panDaw ne basai thi

ise dekha to duryodhan hasad se khaul uTha tha

yahin wo sher-dil chauhan rahta tha

jise aawaz par apna nishana daghne ka kashf aata tha

nizamuddim se ruhaniyat ka dars le kar

wajd-e-KHusraw ne isi ke git gae the

humayun ne isi ki KHak mein KHud ko milaya tha

isi ke dil ki nazuk dhaDkanon ko 'mir'-o-'ghaalib' ne zaban di thi

ye apni zat mein ek muKHtasar hindostan yani

ye rohilon ki nadir shah ki raundi hui dilli

ek aisa shahr hai jo barha ujDa magar jis ne

kabhi apni ada-e-dil-nawazi ko nahin chhoDa

ise taKHrib ke har war ne tamir ka irfan baKHsha hai

yahan har zulm karne wala aaKHir munh ki khata hai

ye har waqt ek albeli dulhan ki misl

apni mang mein sindur bhar kar muntazir rahti hai har aazurda-KHatir ki

yahan har sahib-e-dil aa ke jaana bhul jata hai