din gine ja chuke hain

din gine jā chuke haiñ

kisī raat puure bhī ho jā.eñge

vo sabhī ḳhvāb

jo ham ne dekhe nahīñ the

churā.e the

ik adh-khulī aañkh se

ham ne dekhe hue ḳhvāb dekhe

ham ne biite hue ik badan ko dubāra jiyā

raat bhar piine vāloñ kī ulTī huī

us surāhī se Tapkī huī

qatra qatra sharāb halaq tak aa ga.ī

to khulā

zindagī talḳh hai

saañs lene kī qīmat adā karnā mumkin nahīñ

mustaqil aur hamesha ke chakkar meñ sar ghuum jā.egā duniyā kī juġhrāfiyā.ī hadoñ par

ulajhte hue jānvar ko ḳhabar hī nahīñ sab ulaT jā.egā falsafe se ulajhtī

huī khopaḌī meñ ubaltā huā ye dimāġh ek din bhak se uḌ jā.egā bhuuk aur

jinsiyat par maze lene vāloñ ko mā'lūm hai raushnī aur añdhere meñ kyā farq hai

din gine jā chuke haiñ raushnī ke añdhere ke ḳhvāboñ ke aur us badan ke jise ham

dubāra se jiine kī ḳhvāhish meñ zinda hue haiñ magar zindagī talḳh hai saañs lene

kī qīmat adā karnā mumkin nahīñ din gine jā chuke haiñ

din gine ja chuke hain

kisi raat pure bhi ho jaenge

wo sabhi KHwab

jo hum ne dekhe nahin the

churae the

ek adh-khuli aankh se

hum ne dekhe hue KHwab dekhe

hum ne bite hue ek badan ko dubara jiya

raat bhar pine walon ki ulTi hui

us surahi se Tapki hui

qatra qatra sharab halaq tak aa gai

to khula

zindagi talKH hai

sans lene ki qimat ada karna mumkin nahin

mustaqil aur hamesha ke chakkar mein sar ghum jaega duniya ki jughrafiyai hadon par

ulajhte hue jaanwar ko KHabar hi nahin sab ulaT jaega falsafe se ulajhti

hui khopaDi mein ubalta hua ye dimagh ek din bhak se uD jaega bhuk aur

jinsiyat par maze lene walon ko ma'lum hai raushni aur andhere mein kya farq hai

din gine ja chuke hain raushni ke andhere ke KHwabon ke aur us badan ke jise hum

dubara se jine ki KHwahish mein zinda hue hain magar zindagi talKH hai sans lene

ki qimat ada karna mumkin nahin din gine ja chuke hain