din ke ujale ki koi haqiqat to raat ka andhera bhi wajud rakhta hai

din ke ujāle kī koī haqīqat to raat kā añdherā bhī vajūd rakhtā hai

ham havā ko chhū nahīñ sakte havā hameñ chhūtī hai

maiñ agar tum se nafrat kartā huuñ to mere dil meñ tumhāre liye mohabbat

bhī hai

mohabbat aur nafrat donoñ hī zindagī haiñ

jis tarah raat aur din

āsā.ish agar zindagī hai to be-mā.egī aur masā.ib bhī

jāgnā zindagī hai to niiñd aur niiñd meñ ḳhvāboñ kā aanā bhī

samundar pahāḌ agar kā.enāt kā juz haiñ to hamāre dil kī dhaḌkaneñ bhī

paidā.ish zindagī hai to maut kā āḳhirī pal bhī

in sab chīzoñ ko kyā tum zindagī se alag kar sakte ho

zindagī meñ zindagī samā.ī huī hai

zindagī kabhī fanā nahīñ hotī

ye shakleñ badal kar tumhāre sāmne aa.egī

paidā.ish aur maut zindagī ke hī do naam haiñ

safar kī ibtidā-o-intihā

safar jo zindagī hai

aur zindagī kā.enāt kī dūsrī baḌī sachchā.ī

mauj andar mauj samundar kī tarah asrār-e-ḳhazā.in liye hue

tum agar is dūsrī baḌī sachchā.ī ko samajh sake

to

kā.enāt kī pahlī baḌī sachchā.ī tum par ḳhud-baḳhud āshkār ho jā.egī

din ke ujale ki koi haqiqat to raat ka andhera bhi wajud rakhta hai

hum hawa ko chhu nahin sakte hawa hamein chhuti hai

main agar tum se nafrat karta hun to mere dil mein tumhaare liye mohabbat

bhi hai

mohabbat aur nafrat donon hi zindagi hain

jis tarah raat aur din

aasaish agar zindagi hai to be-maegi aur masaib bhi

jagna zindagi hai to nind aur nind mein KHwabon ka aana bhi

samundar pahaD agar kaenat ka juz hain to hamare dil ki dhaDkanen bhi

paidaish zindagi hai to maut ka aaKHiri pal bhi

in sab chizon ko kya tum zindagi se alag kar sakte ho

zindagi mein zindagi samai hui hai

zindagi kabhi fana nahin hoti

ye shaklen badal kar tumhaare samne aaegi

paidaish aur maut zindagi ke hi do nam hain

safar ki ibtida-o-intiha

safar jo zindagi hai

aur zindagi kaenat ki dusri baDi sachchai

mauj andar mauj samundar ki tarah asrar-e-KHazain liye hue

tum agar is dusri baDi sachchai ko samajh sake

to

kaenat ki pahli baDi sachchai tum par KHud-baKHud aashkar ho jaegi