دن کی آنکھیں تو اندھی ہو ہی چکی ہیں

پر میری آنکھیں نہ جانے کیوں صبح ہی سے جلنے لگتی ہیں

رات سلا تو دیتی ہے

مگر پھر دن بھر جسم پر رینگتی رہتی ہے

امی

تمہارے نئے مٹی والے گھر کا رستہ

میرے رستے ہی میں پڑتا ہے

لیکن کیا کروں

میرے دفتر کی بس تو سات بجے ہی نکل جاتی ہے

میں بس میں بیٹھ تو جاتی ہوں

لیکن نہ جانے کیوں دیر تک ٹانگیں کانپتی رہتی ہیں

امی

گلی میں آج بھی وہ پاگل پھرتا رہتا ہے

جس سے بچانے کی خاطر

تم گلی کے کونے تک آ جاتی تھیں

امی