din phaila hai

bāñsurī kī dhun se chāval kī baalī tak

din phailā hai

aur darāñtī vaale haath meñ us kā dāman

jaise mallāhoñ ke haath meñ jaal ho

yā phir ghoḌ-savār ke haath meñ us kī rāseñ

din phailā hai

dahī bilone kī āvāz se jāmun ke peḌoñ tak

chūḌiyāñ pahanñe vaale haath meñ us kā dāman

khiñchte khiñchte oḌhnī ban jā.egā

din phailā hai

āsmān se bachche kī nannhī muTThī tak

rafta rafta duudh meñ Dhal jā.egā

din phailā hai

rail kī āhanī paTrī par

aur bhaag rahā hai chhoTe shahroñ kī manDī tak

bhāgte bhāgte surḳh anaar meñ Dhal jā.egā

din phailā hai

geñde ke phūloñ meñ

maile bachchoñ kī ḳhālī jeboñ meñ

din phailā hai

merī terī āñkhoñ meñ

jo rafta rafta mustaqbil kī dhun pe gaayā

ujle pāniyoñ jaisā koī

giit banegā

bansuri ki dhun se chawal ki baali tak

din phaila hai

aur daranti wale hath mein us ka daman

jaise mallahon ke hath mein jal ho

ya phir ghoD-sawar ke hath mein us ki rasen

din phaila hai

dahi bilone ki aawaz se jamun ke peDon tak

chuDiyan pahanne wale hath mein us ka daman

khinchte khinchte oDhni ban jaega

din phaila hai

aasman se bachche ki nannhi muTThi tak

rafta rafta dudh mein Dhal jaega

din phaila hai

rail ki aahani paTri par

aur bhag raha hai chhoTe shahron ki manDi tak

bhagte bhagte surKH anar mein Dhal jaega

din phaila hai

gende ke phulon mein

maile bachchon ki KHali jebon mein

din phaila hai

meri teri aankhon mein

jo rafta rafta mustaqbil ki dhun pe gaya

ujle paniyon jaisa koi

git banega