diyanat-dar laDki

ġharīb aadmī ek qasbe meñ thā

bahut dil meñ rakhtā thā ḳhauf-e-ḳhudā

ġharībī meñ īmān-dārī meñ bhī

na qasbe meñ thā us se baḌh kar koī

akelā na thā biivī bachche bhī the

jo the sab ke sab nek ḳhaslat baḌe

suhānā samāñ din thā itvār kā

ki ik chhoTī laḌkī se maañ ne kahā

uTho laao aaTā ki roTī pakā.ūñ

bilakte haiñ bachche inheñ kuchh khilā.ūñ

ga.ī laḌkī aaTā liyā aa ga.ī

lagī gūñdhne maañ to ghabrā ga.ī

ki aaTe meñ do bāliyāñ thiiñ paḌī

har ik sabz kāġhaz meñ lipTī huī

khare sone kī kaam bārīk thā

vo thiiñ dekhne meñ bahut ḳhushnumā

jo laḌkī ne dekhīñ to jhaT bol uThī

yaqīnan ye hoñgī dukāñ-dār kī

abhī dījiye kar duuñ vāpas ise

ye aaTe meñ rakkhī ga.iiñ bhuul se

dukāñ-dār ke paas laḌkī ga.ī

kahā ye to haiñ bāliyāñ aap kī

milī haiñ ye aaTe se le lījiye

ki borī meñ shāyad girīñ aap se

dukāñ-dār bolā uThā lo tumhīñ

suno in kā qissa ye merī nahīñ

yahāñ ek aayā amiir aadmī

mujhe bāliyāñ diiñ hidāyat ye kī

ye denā kisī saḳht muhtāj ko

diyānat meñ bhī sab se baḌh kar jo ho

ye bāteñ tumhīñ meñ haiñ lo bas uThāo

tumhārī haiñ ye bāliyāñ le bhī jaao

ghar aa.ī jo laḌkī liye bāliyāñ

sunā qissa hairāñ huī saḳht maañ

diyānat se hotā hai raazī ḳhudā

diyānat kā laḌkī ko ye phal milā

gharib aadmi ek qasbe mein tha

bahut dil mein rakhta tha KHauf-e-KHuda

gharibi mein iman-dari mein bhi

na qasbe mein tha us se baDh kar koi

akela na tha biwi bachche bhi the

jo the sab ke sab nek KHaslat baDe

suhana saman din tha itwar ka

ki ek chhoTi laDki se man ne kaha

uTho lao aaTa ki roTi pakaun

bilakte hain bachche inhen kuchh khilaun

gai laDki aaTa liya aa gai

lagi gundhne man to ghabra gai

ki aaTe mein do baaliyan thin paDi

har ek sabz kaghaz mein lipTi hui

khare sone ki kaam barik tha

wo thin dekhne mein bahut KHushnuma

jo laDki ne dekhin to jhaT bol uThi

yaqinan ye hongi dukan-dar ki

abhi dijiye kar dun wapas ise

ye aaTe mein rakkhi gain bhul se

dukan-dar ke pas laDki gai

kaha ye to hain baaliyan aap ki

mili hain ye aaTe se le lijiye

ki bori mein shayad girin aap se

dukan-dar bola uTha lo tumhin

suno in ka qissa ye meri nahin

yahan ek aaya amir aadmi

mujhe baaliyan din hidayat ye ki

ye dena kisi saKHt muhtaj ko

diyanat mein bhi sab se baDh kar jo ho

ye baaten tumhin mein hain lo bas uThao

tumhaari hain ye baaliyan le bhi jao

ghar aai jo laDki liye baaliyan

suna qissa hairan hui saKHt man

diyanat se hota hai raazi KHuda

diyanat ka laDki ko ye phal mila