diye ki lau

diye kī lau thartharā rahī hai

ye shām-e-ġham hai ki āfatoñ kī sahar huī hai

fasīl-e-shab par udaas jugnū

kisī musāfir kī raah tak kar

luTā chukā hai tamām raushan bahār apnī

parinde uḌne ko muztarib haiñ

maveshī-ḳhānoñ meñ phir machī hai ajiib halchal

jo bachche maaoñ kī chhātiyoñ se

lipaT ke so.e the jaag uThe haiñ

vahī taḌap bhuuk kī vo shiddat

azaan sehn-e-chaman meñ detā hai murġh aise

kisī ko jaise koī fasāna sunā rahā hai

uTho añdherā bahut hai lekin

charāġh le kar talāsh karnā hai tum ko sūraj

diye kī lau thartharā rahī hai

diye ki lau tharthara rahi hai

ye sham-e-gham hai ki aafaton ki sahar hui hai

fasil-e-shab par udas jugnu

kisi musafir ki rah tak kar

luTa chuka hai tamam raushan bahaar apni

parinde uDne ko muztarib hain

maweshi-KHanon mein phir machi hai ajib halchal

jo bachche maon ki chhatiyon se

lipaT ke soe the jag uThe hain

wahi taDap bhuk ki wo shiddat

azan sehn-e-chaman mein deta hai murgh aise

kisi ko jaise koi fasana suna raha hai

uTho andhera bahut hai lekin

charagh le kar talash karna hai tum ko suraj

diye ki lau tharthara rahi hai