do-aba bast jalandhar

ai vatan ai lahlahātī khetoñ kī sar-e-zamīñ

ai nagīn-e-ḳhātim-e-punjab ai arz-e-hasīñ

suur bīroñ sūrmāoñ pahalvānoñ ke vatan

mehnatī bandoñ jiyāloñ ke kisānoñ ke vatan

tū janmdātā bhagat-singh aur sharaddhā-nand kā

madrasa tū sūfiyoñ santoñ ke va.az-o-pand kā

rai-zādoñ aur sardāroñ kī ḳhāk-e-pāk tū

shā.irān-e-ḳhush-bayāñ kā marja-e-idrāk tū

kitne mausīqār kitne shā.erān-e-ḳhush-navā

māhir-e-tālīm kitne aur kitne rahnumā

terī ḳhāk-e-pāk se uThe haiñ kitne nek naam

āsmān-e-auj par jin ko milā ūñchā maqām

kitne mardān-e-jarī kitne javānān-e-ġhayūr

kitne sāheb-e-aql kitne mālik-e-fahm-o-shu.ūr

zindagī kī Doltī kashtī ke kitne nāḳhudā

kitne mardān-e-haqīqat kosh kitne bā-ḳhudā

ġhairat-e-bāġh-e-iram haiñ khetiyāñ har gaañv meñ

ḳhuld kā ārām hai peḌoñ kī ThanDī chhāñv meñ

zaad būm-e-arsh rif.at-āshnā terī ḳhaak

'josh' ke ḳhurshīd-e-ma.anī kī ziyā se tābnāk

maiñ ne un rāhoñ meñ dekhī haiñ bahut nairañgiyāñ

Dholakoñ ke zer-o-bam chimToñ kī ḳhush-āhañgiyāñ

haiñ kahīñ sarsoñ kahīñ gehūñ kahīñ ganne ke khet

hai kahīñ chāñdī sā paanī kahīñ sone sī ret

ik taraf chalte haiñ hal ik samt chalte haiñ ḳharrās

itnī mehnat aur lab par naġhma-e-shukr-o-sipās

gosha gosha terā nūr-e-ilm se ma.amūr hai

zarra zarra hāmil-e-nūr-e-charāġh-e-tūr hai

terī punjabi zabāñ meñ lutf-e-shahd-o-qand hai

is qadar saada ki har rāh-e-takalluf band hai

sabt hai duniyā pe terā sikka-e-farzāñgī

ilm kī ḳhātir dikhā.ī tū ne vo dīvāngī

jis jagah se bhī milā hai mujh ko jo har tujh meñ hai

'malsiyāñ' tujh meñ 'nakodar' tujh meñ 'shañkar' tujh meñ hai

'malsiyāñ' kī ḳhaak se uThā 'nakodar' meñ palā

bārhā maiñ vālihānā āzim-e-'shañkar' huā

uf vo mele chaukiyoñ ke uf vo mīThī boliyāñ

yaad haiñ ab tak mujhe vo sar-phiroñ kī Toliyāñ

vo zamāna jin dinoñ khaḌkā basantā the javāñ

maiñ yahāñ har saal aa kar dekhtā thā kashtiyāñ

ik taraf mele meñ hotā pahalvānoñ kā hujūm

dūsrī jānib yahāñ shatranj kī machtī thī dhuum

chhinj kā melā bhī thā shatranj kā melā bhī thā

shātirī meñ fard chhajju-rām se khelā bhī thā

savarn-singh is ḳhaak kā beTā hai ham-maktab mirā

ahd-e-tiflī meñ thā jo ham-rāz-o-ham-mashrāb mirā

faḳhr-e-shañkar haiñ rulā-rām aur mathurā-dās bhī

qābil-e-izzat narindar-singh se syaas bhī

pahalvānoñ meñ hai pur-tāzīm 'girdāvar' kā naam

shātiroñ meñ hasan-lāl ik shātir-e-ālī-e-maqām

assalām ai bast jālandhar do-ābe kī zamīñ

haiñ do-ābe to bahut tujh sā magar koī nahīñ

ai watan ai lahlahati kheton ki sar-e-zamin

ai nagin-e-KHatim-e-punjab ai arz-e-hasin

sur biron surmaon pahalwanon ke watan

mehnati bandon jiyalon ke kisanon ke watan

tu janmdata bhagat-singh aur sharaddha-nand ka

madrasa tu sufiyon santon ke waz-o-pand ka

rai-zadon aur sardaron ki KHak-e-pak tu

shairan-e-KHush-bayan ka marja-e-idrak tu

kitne mausiqar kitne shaeran-e-KHush-nawa

mahir-e-talim kitne aur kitne rahnuma

teri KHak-e-pak se uThe hain kitne nek nam

aasman-e-auj par jin ko mila uncha maqam

kitne mardan-e-jari kitne jawanan-e-ghayur

kitne saheb-e-aql kitne malik-e-fahm-o-shuur

zindagi ki Dolti kashti ke kitne naKHuda

kitne mardan-e-haqiqat kosh kitne ba-KHuda

ghairat-e-bagh-e-iram hain khetiyan har ganw mein

KHuld ka aaram hai peDon ki ThanDi chhanw mein

zad bum-e-arsh rifat-ashna teri KHak

'josh' ke KHurshid-e-mani ki ziya se tabnak

main ne un rahon mein dekhi hain bahut nairangiyan

Dholakon ke zer-o-bam chimTon ki KHush-ahangiyan

hain kahin sarson kahin gehun kahin ganne ke khet

hai kahin chandi sa pani kahin sone si ret

ek taraf chalte hain hal ek samt chalte hain KHarras

itni mehnat aur lab par naghma-e-shukr-o-sipas

gosha gosha tera nur-e-ilm se mamur hai

zarra zarra hamil-e-nur-e-charagh-e-tur hai

teri punjabi zaban mein lutf-e-shahd-o-qand hai

is qadar sada ki har rah-e-takalluf band hai

sabt hai duniya pe tera sikka-e-farzangi

ilm ki KHatir dikhai tu ne wo diwangi

jis jagah se bhi mila hai mujh ko jo har tujh mein hai

'malsiyan' tujh mein 'nakodar' tujh mein 'shankar' tujh mein hai

'malsiyan' ki KHak se uTha 'nakodar' mein pala

barha main walihana aazim-e-'shankar' hua

uf wo mele chaukiyon ke uf wo miThi boliyan

yaad hain ab tak mujhe wo sar-phiron ki Toliyan

wo zamana jin dinon khaDka basanta the jawan

main yahan har sal aa kar dekhta tha kashtiyan

ek taraf mele mein hota pahalwanon ka hujum

dusri jaanib yahan shatranj ki machti thi dhum

chhinj ka mela bhi tha shatranj ka mela bhi tha

shatiri mein fard chhajju-ram se khela bhi tha

sawarn-singh is KHak ka beTa hai ham-maktab mera

ahd-e-tifli mein tha jo ham-raaz-o-ham-mashrab mera

faKHr-e-shankar hain rula-ram aur mathura-das bhi

qabil-e-izzat narindar-singh se syas bhi

pahalwanon mein hai pur-tazim 'girdawar' ka nam

shatiron mein hasan-lal ek shatir-e-ali-e-maqam

assalam ai bast jalandhar do-abe ki zamin

hain do-abe to bahut tujh sa magar koi nahin