do charagh

tīrgī ke siyāh-ġhāroñ se

shahparoñ kī sadā.eñ aatī haiñ

le ke jhoñkoñ kī tez talvāreñ

ThanDī ThanDī havā.eñ aatī haiñ

barf ne jin pe dhaar rakkhī hai

ek mailī dukān tiira o taar

ik charāġh aur ek doshīza

ye bujhī sī hai vo udaas sā hai

donoñ jāḌoñ kī lambī rātoñ meñ

tīrgī aur havā se laḌte haiñ

tīrgī uTh rahī hai maidāñ se

fauj-dar-fauj bādaloñ kī tarah

aur havāoñ ke haath haiñ gustāḳh

toḌe lete haiñ nanhe shole ko

noche lete haiñ maile āñchal ko

laḌkī rah rah ke jism Dhāñptī hai

shola rah rah ke thar tharātā hai

nañgī būḌhī zamīn kāñptī hai

tīrgī ab siyah-samundar hai

aur havā ho ga.ī hai dīvānī

yā to donoñ charāġh gul hoñge

yā kareñge vo shola-afshānī

phūñk Dāleñge tīrgī kī matā

par mujhe e'timād hai in par

go ġharīb aur be-zabān se haiñ

donoñ haiñ aag donoñ haiñ shola

donoñ bijlī ke ḳhāndān se haiñ

tirgi ke siyah-ghaaron se

shahparon ki sadaen aati hain

le ke jhonkon ki tez talwaren

ThanDi ThanDi hawaen aati hain

barf ne jin pe dhaar rakkhi hai

ek maili dukan tera o tar

ek charagh aur ek doshiza

ye bujhi si hai wo udas sa hai

donon jaDon ki lambi raaton mein

tirgi aur hawa se laDte hain

tirgi uTh rahi hai maidan se

fauj-dar-fauj baadalon ki tarah

aur hawaon ke hath hain gustaKH

toDe lete hain nanhe shole ko

noche lete hain maile aanchal ko

laDki rah rah ke jism Dhanpti hai

shola rah rah ke thar tharaata hai

nangi buDhi zamin kanpti hai

tirgi ab siyah-samundar hai

aur hawa ho gai hai diwani

ya to donon charagh gul honge

ya karenge wo shola-afshani

phunk Dalenge tirgi ki mata

par mujhe e'timad hai in par

go gharib aur be-zaban se hain

donon hain aag donon hain shola

donon bijli ke KHandan se hain