do lafzon ki duri par chahaton ke mausam

shab hai us ne mujh se kahā thā

jānāñ

baiTho

aaj baḌe din baa'd aa.ī ho

shāyad tum to in galiyoñ ko in rastoñ ko darvāzoñ ko

ik muddat se bhuul chukī ho

rishtoñ ke darvāzoñ se darvāze milte haiñ

aur dīvāreñ dīvāroñ se

āñkhoñ se ojhal hone se

rishte kam nahīñ paḌ jaate

us ne kahā phir

baiTho jānāñ chaa.e piyogī

aaj tumheñ maiñ apne haath kī chaa.e lā kar detā huuñ

pī kar mujhe batānā tum

kaisī hai ye

jāntī ho nā mujhe

bhulakkaḌ sā huuñ maiñ

chīzeñ aksar rakh kar kahīñ pe bhī

kho jaatā huuñ

sochoñ meñ gum ho jaatā huuñ

yaad nahīñ rahtā hai aksar

chīnī Daalī hai yā phīkī

lekin chhoḌo merī gumshudgī kī bāteñ

chaa.e pī kar batlānā tum

is meñ mīThā kam yā ziyāda

yā phīkī hai

mīThā Dālnā bhuul gayā huuñ

yā phir

us ke chehre par aa.ī

us ek tamanna kī vo rangat

shādābī maiñ dekh rahī thī

us kī āñkheñ mere laboñ se

dād-talab thiiñ

us kī āñkheñ DhūñD rahī thiiñ jaane kyā

merī āñkhoñ meñ

us ne kahā phir

jānāñ

chaa.e mīThī huī to tum jaisī hai

phīkī huī to mujh jaisī

hañste hañste chaa.e kā phir sip liyā maiñ ne

us kā dhyān baTā kar

phir bātoñ bātoñ meñ maiñ ne

us kā cup bhī pī Daalā

us chehre kī shādābī

ke murjhāne se pahle pahle

us ik phuul ke kumhlāne se pahle pahle

chāhat ke mausam kī sarhad

mīThe phīke

do lafzoñ kī duurī par hai

shab hai us ne mujh se kaha tha

jaanan

baiTho

aaj baDe din ba'd aai ho

shayad tum to in galiyon ko in raston ko darwazon ko

ek muddat se bhul chuki ho

rishton ke darwazon se darwaze milte hain

aur diwaren diwaron se

aankhon se ojhal hone se

rishte kam nahin paD jate

us ne kaha phir

baiTho jaanan chae piyogi

aaj tumhein main apne hath ki chae la kar deta hun

pi kar mujhe batana tum

kaisi hai ye

jaanti ho na mujhe

bhulakkaD sa hun main

chizen aksar rakh kar kahin pe bhi

kho jata hun

sochon mein gum ho jata hun

yaad nahin rahta hai aksar

chini Dali hai ya phiki

lekin chhoDo meri gumshudgi ki baaten

chae pi kar batlana tum

is mein miTha kam ya ziyaada

ya phiki hai

miTha Dalna bhul gaya hun

ya phir

us ke chehre par aai

us ek tamanna ki wo rangat

shadabi main dekh rahi thi

us ki aankhen mere labon se

dad-talab thin

us ki aankhen DhunD rahi thin jaane kya

meri aankhon mein

us ne kaha phir

jaanan

chae miThi hui to tum jaisi hai

phiki hui to mujh jaisi

hanste hanste chae ka phir sip liya main ne

us ka dhyan baTa kar

phir baaton baaton mein main ne

us ka cup bhi pi Dala

us chehre ki shadabi

ke murjhane se pahle pahle

us ek phul ke kumhlane se pahle pahle

chahat ke mausam ki sarhad

miThe phike

do lafzon ki duri par hai