do or die

ga.e zamānoñ kī gardishoñ ko maiñ aañkh kī putliyoñ meñ rakkhūñ

maiñ kab talak hone aur na hone ke darmiyāñ kī aziyyatoñ kī ḳharāsh

apne badan pe dekhūñ

maiñ kis liye baam par sajā.ūñ kuñvārī sharmīlī dhaḌkaneñ ab

maiñ kaise apne laboñ kī ḳhushbū kā baar le kar sanobaroñ kā samāñ banā.ūñ

maiñ kis liye rādhā ban ke nāchūñ to shaam murlī ke giit gā.ūñ

kahāñ kā sāvan kahāñ kī chatrī kahāñ ke dohe kahāñ kī purvā

maiñ saat rangoñ ko kis pe pheñkūñ

maiñ majlisoñ meñ kis hasīn ke nauhe gā.ūñ

maiñ mausamoñ ke surāġh le kar haqīqatoñ ko kahāñ tak shā.irī meñ Dhālūñ

mire azīzo safar hai thoḌā to rog zyāda

balā se koī na aa.e ab intizār muk gayā hai

havā.eñ kal kī kahāniyoñ ko sajā rahī haiñ

maiñ tez-tar aur jadīd ohdoñ meñ jī rahī huuñ

maiñ aaj huuñ aur aaj ban ke bikhar rahī huuñ har ek samt

merā hai kalima do or die

gae zamanon ki gardishon ko main aankh ki putliyon mein rakkhun

main kab talak hone aur na hone ke darmiyan ki aziyyaton ki KHarash

apne badan pe dekhun

main kis liye baam par sajaun kunwari sharmili dhaDkanen ab

main kaise apne labon ki KHushbu ka bar le kar sanobaron ka saman banaun

main kis liye radha ban ke nachun to sham murli ke git gaun

kahan ka sawan kahan ki chatri kahan ke dohe kahan ki purwa

main sat rangon ko kis pe phenkun

main majlison mein kis hasin ke nauhe gaun

main mausamon ke suragh le kar haqiqaton ko kahan tak shairi mein Dhaalun

mere azizo safar hai thoDa to rog zyaada

bala se koi na aae ab intizar muk gaya hai

hawaen kal ki kahaniyon ko saja rahi hain

main tez-tar aur jadid ohdon mein ji rahi hun

main aaj hun aur aaj ban ke bikhar rahi hun har ek samt

mera hai kalima do or die