donon pareshan ho gae

sab se pahle ishq meñ unglī hī pakḌī jaa.e hai

rafta-rafta phir kahīñ pahuñche kā number aa.e hai

roz mujh ko va.ada-e-fardā pe jo Tarḳhā.e hai

maiñ tirī chāloñ ko samjhūñ huuñ mujhe bahlā.e hai

vo to sach-much qatl ke maidāñ meñ haiñ ḳhanjar-ba-kaf

ab na Thahrā jaa.e hai mujh se na bhāgā jaa.e hai

dil to dil haañ jaan kho kar bhī na paayā aap ko

ham to sunte aa.e haiñ jo kho.e hai vo paa.e hai

dekh hāthā-pā.ī kī naubat na aa jaa.e kahīñ

kyā tirī shāmat na gherā hai jo tū sharmā.e hai

un kī chāhat thī mujhe ab merī chāhat hai unheñ

husn bhī to ishq ke sāñche meñ Dhaltā jaa.e hai

tujh se terī zulf se donoñ pareshāñ ho ga.e

mujh ko tū laTkā.e hai aur dil ko vo laTkā.e hai

mujh se ye kah kar sifārish kar rahe haiñ ġhair kī

haa.e bechāra hamesha Tāptā rah jaa.e hai

arz-e-dil sun kar ajiib andāz se kahne lage

merī suntā hī nahīñ bas apnī apnī gaa.e hai

kuchh mirī tadbīr se kuchh ġhair kī taqdīr se

kaam bantā hai magar ban ban ke bigḌā jaa.e hai

sharbat-e-dīdār kī ummīd un se kyā kareñ

ab shakar miltī nahīñ hai sirf guḌ kī chaa.e hai

jāgnā aur intizār-e-yār karnā hai fuzūl

roz kā dhandā hai ye vo aa.e hai na jaa.e hai

ik jhalak dikhlā ke tū haftoñ ko pinhāñ ho gayā

mujh pe mere yaar kyoñ jhūTā karam farmā.e hai

baat qaabū kī nahīñ hai ab to maiñ majbūr huuñ

kyā tabī.at ko sañbhālūñ dil to phislā jaa.e hai

maiñ ne maanā sher mere kuchh nahīñ phir bhī 'zarīf'

kuchh na kuchh mahfil kā in se rang to jam jaa.e hai

sab se pahle ishq mein ungli hi pakDi jae hai

rafta-rafta phir kahin pahunche ka number aae hai

roz mujh ko wada-e-farda pe jo TarKHae hai

main teri chaalon ko samjhun hun mujhe bahlae hai

wo to sach-much qatl ke maidan mein hain KHanjar-ba-kaf

ab na Thahra jae hai mujh se na bhaga jae hai

dil to dil han jaan kho kar bhi na paya aap ko

hum to sunte aae hain jo khoe hai wo pae hai

dekh hatha-pai ki naubat na aa jae kahin

kya teri shamat na ghera hai jo tu sharmae hai

un ki chahat thi mujhe ab meri chahat hai unhen

husn bhi to ishq ke sanche mein Dhalta jae hai

tujh se teri zulf se donon pareshan ho gae

mujh ko tu laTkae hai aur dil ko wo laTkae hai

mujh se ye kah kar sifarish kar rahe hain ghair ki

hae bechaara hamesha Tapta rah jae hai

arz-e-dil sun kar ajib andaz se kahne lage

meri sunta hi nahin bas apni apni gae hai

kuchh meri tadbir se kuchh ghair ki taqdir se

kaam banta hai magar ban ban ke bigDa jae hai

sharbat-e-didar ki ummid un se kya karen

ab shakar milti nahin hai sirf guD ki chae hai

jagna aur intizar-e-yar karna hai fuzul

roz ka dhanda hai ye wo aae hai na jae hai

ek jhalak dikhla ke tu hafton ko pinhan ho gaya

mujh pe mere yar kyon jhuTa karam farmae hai

baat qabu ki nahin hai ab to main majbur hun

kya tabiat ko sanbhaalun dil to phisla jae hai

main ne mana sher mere kuchh nahin phir bhi 'zarif'

kuchh na kuchh mahfil ka in se rang to jam jae hai