dosto aao aaj aasman ki gahri nilahaTon par

dosto aao aaj āsmān kī gahrī nīlāhaToñ par

apnī udāsī kā jaal pheñkeñ

aur dekheñ

ye gol gol chāñd sitāre

jo bushirt meñ tañke hue baTanoñ kī tarah jagmagāte haiñ

kyoñ haath nahīñ aate haiñ

kis liye duur ḳhalā kī barf sī chādar

adh-khulī aañkh kī tarah ḳhvābīda hai

kaun hai jo āsmān ke sabz gumbad meñ baiThā huā

sadāoñ ke samandar nīche aur nīche

bahātā jā rahā hai

pātāl lok kī be-ḳhvāb nagrī meñ base hue log

apnī khaal ke andar ke zaḳhm ko maze le le kar

apne tez nāḳhunoñ se khurachte haiñ

aur rāhat kī saañs lete haiñ

pahchān ke saare alfāz sirf havā meñ tairte haiñ

hoñToñ se nikle hue shabdoñ kī kaḌiyāñ

sirf dikhāvā maatr haiñ kahīñ kuchh bhī nahīñ

na koī aatā hai aur na koī jaatā hai

sirf ek vahshī samandar hai jo din-rāt chīḳhtā hai

udaas nasloñ ko apne anjām ke liye kuchh bhī nahīñ sochnā hai

dekhne aur sunñe kā kaam karte haiñ computers

is liye

fikr kī koī baat nahīñ

botal ko haath meñ le kar yūñhī piite raho

dosto aao aaj aasman ki gahri nilahaTon par

apni udasi ka jal phenken

aur dekhen

ye gol gol chand sitare

jo bushirt mein tanke hue baTanon ki tarah jagmagate hain

kyon hath nahin aate hain

kis liye dur KHala ki barf si chadar

adh-khuli aankh ki tarah KHwabida hai

kaun hai jo aasman ke sabz gumbad mein baiTha hua

sadaon ke samandar niche aur niche

bahata ja raha hai

patal lok ki be-KHwab nagri mein base hue log

apni khaal ke andar ke zaKHm ko maze le le kar

apne tez naKHunon se khurachte hain

aur rahat ki sans lete hain

pahchan ke sare alfaz sirf hawa mein tairte hain

honTon se nikle hue shabdon ki kaDiyan

sirf dikhawa matr hain kahin kuchh bhi nahin

na koi aata hai aur na koi jata hai

sirf ek wahshi samandar hai jo din-raat chiKHta hai

udas naslon ko apne anjam ke liye kuchh bhi nahin sochna hai

dekhne aur sunne ka kaam karte hain computers

is liye

fikr ki koi baat nahin

botal ko hath mein le kar yunhi pite raho