dua aur bad-dua ke darmiyan

duā aur bad-duā ke darmiyāñ jab rābte kā pul nahīñ TuuTā

to maiñ kis tarah pahuñchā bad-duā.eñ dene vāloñ meñ

maiñ un kī ham-navā.ī par huā māmūr

ham-āvāz huuñ un kā

ki jin ke nāma-e-āmāl meñ in bad-duāoñ ke sivā kuchh bhī nahīñ

un ke kahe par aaj tak bādal nahīñ barse

kabhī mausam nahīñ badle

koī tūfāñ, koī sailāb un kī ārzūoñ se nahīñ palTā

ye nādāñ, saare maqtūloñ kī fihristeñ uThā.e āsmāñ ko dekhte haiñ

aur samajhte haiñ ki duniyā un ke naam aur shakl-o-sūrat bhuul jā.egī

vagarna qātiloñ ko ḳhud-kushī karnā paḌegī

aur ye itne bahādur bhī nahīñ hote

to jab tak āsmānoñ aur hamāre darmiyāñ haa.il

hujūm-e-qātilāñ chhaTtā nahīñ haTtā nahīñ parda

duā aur bad-duā ke lafz ham-ma.anī raheñge

ab duā-e-zindagī qātil ko deñ

yā bad-duā ḳhud ko

dua aur bad-dua ke darmiyan jab rabte ka pul nahin TuTa

to main kis tarah pahuncha bad-duaen dene walon mein

main un ki ham-nawai par hua mamur

ham-awaz hun un ka

ki jin ke nama-e-amal mein in bad-duaon ke siwa kuchh bhi nahin

un ke kahe par aaj tak baadal nahin barse

kabhi mausam nahin badle

koi tufan, koi sailab un ki aarzuon se nahin palTa

ye nadan, sare maqtulon ki fihristen uThae aasman ko dekhte hain

aur samajhte hain ki duniya un ke nam aur shakl-o-surat bhul jaegi

wagarna qatilon ko KHud-kushi karna paDegi

aur ye itne bahadur bhi nahin hote

to jab tak aasmanon aur hamare darmiyan hail

hujum-e-qatilan chhaTta nahin haTta nahin parda

dua aur bad-dua ke lafz ham-mani rahenge

ab dua-e-zindagi qatil ko den

ya bad-dua KHud ko