dua

Daal de merī sadā se khalbalī ahbāb meñ

bhar de barq-e-zindagī un ke dil-e-betāb meñ

yā-rab un kī chashm-o-dil ko bhī dikhā aisī jhalak

aks jis aalam kā hai us dīda-e-be-ḳhvāb meñ

zindagī ke sāġharoñ meñ muntaqil kar de unheñ

gardisheñ tūfān ne dekhī haiñ jo girdāb meñ

josh ubharne kā ho kaash itnā hī ahl-e-asr meñ

jis qadar paiham chamak hai kirmak-e-shab-tāb meñ

kaash utnī hī taḌap jazbāt meñ paidā kareñ

jis qadar dariyā kī maujoñ meñ hai yā sīmāb meñ

mushkileñ is tarah hal hotī haiñ josh-e-azm se

bah nikaltī haiñ chaTāneñ jis tarah sailāb meñ

garche dil ThanDe hoñ tāham un meñ bhar sakte haiñ ham

phailne kī hai jo quvvat chādar-e-mahtāb meñ

dil ko garmā.eñ to har zarre se us ke ho ayaañ

jo harārat hai shuā-e-mahr-e-ālam-tāb meñ

vo tabī.at murda hai pazhmurda hai jis meñ na ho

tāzgī jo sabza meñ hai yā gul-e-shādāb meñ

Dal de meri sada se khalbali ahbab mein

bhar de barq-e-zindagi un ke dil-e-betab mein

ya-rab un ki chashm-o-dil ko bhi dikha aisi jhalak

aks jis aalam ka hai us dida-e-be-KHwab mein

zindagi ke sagharon mein muntaqil kar de unhen

gardishen tufan ne dekhi hain jo girdab mein

josh ubharne ka ho kash itna hi ahl-e-asr mein

jis qadar paiham chamak hai kirmak-e-shab-tab mein

kash utni hi taDap jazbaat mein paida karen

jis qadar dariya ki maujon mein hai ya simab mein

mushkilen is tarah hal hoti hain josh-e-azm se

bah nikalti hain chaTanen jis tarah sailab mein

garche dil ThanDe hon taham un mein bhar sakte hain hum

phailne ki hai jo quwwat chadar-e-mahtab mein

dil ko garmaen to har zarre se us ke ho ayan

jo hararat hai shua-e-mahr-e-alam-tab mein

wo tabiat murda hai pazhmurda hai jis mein na ho

tazgi jo sabza mein hai ya gul-e-shadab mein