dukan-dar

ye tājirān-e-dīn haiñ

ḳhudā ke ghar makīn haiñ

har ik ḳhudā ke ghar pe un ko apnā naam chāhiye

ḳhudā ke naam ke evaz kul intizām chāhiye

har ek chāhtā hai ye

mirā ḳhudā ḳharīd lo

na kar sake ye tum agar

ye tājirān-e-pesha-var

kareñge tum se yuuñ ḳhitāb

intiqām chāhiye

merī kitāb jo kahe

vo hī nizām chāhiye

ḳhudā ke jitne ruup haiñ

unhoñ ne ḳhud banā.e haiñ

har ik ḳhudā meñ sāhibo

vo saarī ḳhūbiyāñ haiñ jo

unheñ bahut aziiz haiñ

har ik dukān par yahāñ

nayā ḳhudā sajā huā

har ik dukān-dār kī

faqat yahī hai iltijā

mirā ḳhudā ḳharīd lo

ḳhudā kī bhī sune koī

vo kah rahā hai bas yahī

ki sāhibo maiñ ek huuñ

mire sivā koī nahīñ

kisī kī baat mat suno

mirā to koī ghar nahīñ

diloñ meñ bas rahā huuñ maiñ

har ek pal

har ek saañs

tum meñ jī rahā huuñ maiñ

na ḳhud tum apnī jaan lo

ki tum hī merī jaan ho

jo tum ne jaan vaar dī

to maiñ kahāñ basūñgā phir

mirā to koī ghar nahīñ

jo bechte haiñ apne ghar

sajā ke mere naam par

ye nafs ke asiir haiñ

ye log be zamīr haiñ

ye tajiran-e-din hain

KHuda ke ghar makin hain

har ek KHuda ke ghar pe un ko apna nam chahiye

KHuda ke nam ke ewaz kul intizam chahiye

har ek chahta hai ye

mera KHuda KHarid lo

na kar sake ye tum agar

ye tajiran-e-pesha-war

karenge tum se yun KHitab

intiqam chahiye

meri kitab jo kahe

wo hi nizam chahiye

KHuda ke jitne rup hain

unhon ne KHud banae hain

har ek KHuda mein sahibo

wo sari KHubiyan hain jo

unhen bahut aziz hain

har ek dukan par yahan

naya KHuda saja hua

har ek dukan-dar ki

faqat yahi hai iltija

mera KHuda KHarid lo

KHuda ki bhi sune koi

wo kah raha hai bas yahi

ki sahibo main ek hun

mere siwa koi nahin

kisi ki baat mat suno

mera to koi ghar nahin

dilon mein bas raha hun main

har ek pal

har ek sans

tum mein ji raha hun main

na KHud tum apni jaan lo

ki tum hi meri jaan ho

jo tum ne jaan war di

to main kahan basunga phir

mera to koi ghar nahin

jo bechte hain apne ghar

saja ke mere nam par

ye nafs ke asir hain

ye log be zamir hain