dukh ka zaiqa

mere logo

dukh se samjhauta na karnā varna dukh bhī kaḌvāhaToñ kī tarah

tumhāre zā.iqe kā hissa ban jā.egā

tum dukh ke baare meñ ġhaur karnā

us kī māhiyat jānñā us kī tum drawing karnā

aur sar joḌ kar us tasvīr se bāteñ karnā

galī ke bāhar maidānoñ meñ khetoñ meñ ghar kī chhatoñ ke uupar

har taraf bāteñ karnā dukh kī aane vaale sukh kī

mere logo

dukh ko jab pahchānoge to us kā qarz utāroge

ik ik paisa jam.a karnā sukh kī ḳhātir

hathiyār banānā zehnoñ meñ tasvīroñ meñ tahrīroñ meñ

phir dukh ke aage DaT jaanā

aur aisī dīvār banñā jis kī tayyārī meñ kaafī din lage hoñ

kaafī log lage hoñ

saarī ḳhūbiyāñ us dīvār meñ hoñ sab sailāboñ ke aage DaT jaane kī

mere achchhe logo

kyā tum ne sochā hai ki dīvāreñ bhī nañgī ho jaatī haiñ kuchh īñToñ ke gir jaane se

tum soch samajh ke apne sangī sāthī banānā

īñToñ ko girne na denā

dhīmī aañch meñ dhīme dhīme bāteñ karnā sukh kī sukh kī

tum meñ jo sab se achchhī bāteñ karegā

vahī tumhārā sāthī hogā vahī tumhārā sūraj hogā

mere logo

dukh ke dinoñ meñ sūraj ke raste par chalnā

us ke Dūbne ubharne ke manzar par ġhaur karnā

mere logo jhiil kī mānind chup na rahnā

bāteñ karnā chalte rahnā dariyā kī ravānī banñā

mere logo

dukh se kabhī samjhauta mat karnā hañste rahnā

dukh ke ghoḌe kī lagāmoñ ko pakaḌ kar havā se bāteñ karnā

ūñchā uḌnā

mere logo

dukh se samjhauta na karna warna dukh bhi kaDwahaTon ki tarah

tumhaare zaiqe ka hissa ban jaega

tum dukh ke bare mein ghaur karna

us ki mahiyat jaanna us ki tum drawing karna

aur sar joD kar us taswir se baaten karna

gali ke bahar maidanon mein kheton mein ghar ki chhaton ke upar

har taraf baaten karna dukh ki aane wale sukh ki

mere logo

dukh ko jab pahchanoge to us ka qarz utaroge

ek ek paisa jama karna sukh ki KHatir

hathiyar banana zehnon mein taswiron mein tahriron mein

phir dukh ke aage DaT jaana

aur aisi diwar banna jis ki tayyari mein kafi din lage hon

kafi log lage hon

sari KHubiyan us diwar mein hon sab sailabon ke aage DaT jaane ki

mere achchhe logo

kya tum ne socha hai ki diwaren bhi nangi ho jati hain kuchh inTon ke gir jaane se

tum soch samajh ke apne sangi sathi banana

inTon ko girne na dena

dhimi aanch mein dhime dhime baaten karna sukh ki sukh ki

tum mein jo sab se achchhi baaten karega

wahi tumhaara sathi hoga wahi tumhaara suraj hoga

mere logo

dukh ke dinon mein suraj ke raste par chalna

us ke Dubne ubharne ke manzar par ghaur karna

mere logo jhil ki manind chup na rahna

baaten karna chalte rahna dariya ki rawani banna

mere logo

dukh se kabhi samjhauta mat karna hanste rahna

dukh ke ghoDe ki lagamon ko pakaD kar hawa se baaten karna

uncha uDna