dasahra

hai dasahrā yādgār-e-azmat-e-hindostāñ

hinduoñ kī ik qadīmī fat.h-o-nusrat kā nishāñ

ik miTī sī ye nishānī daulat-o-iqbāl kī

yaad dilvātī hai un ayyām-e-farruḳh-fāl kī

jab ki thī ham meñ bhī aise zor-o-tāqat kī numūd

hech thī dīvān ro.eñ tan kī jis se hast-o-būd

jab akele uTh khaḌe hote the ham bahar-e-nabard

aur kar dete the apne dushmanoñ ko gard gard

dil meñ himmat haath meñ apne faqat shor-e-al-amāñ

bāñdh kar vo pul samundar ko kiyā ham ne ubuur

jis ko hairāñ dekh kar haiñ aaj bhī ahl-e-shu.ūr

fauj-e-rāvan lā-ta.ad thī reg-e-sahrā kī tarah

aur umañD aa.ī thī vaqt-e-jang dariyā kī tarah

rāvan-e-ḳhuñḳhār aur vo koh-paikar is ke dev

jin kī ḳhūñ-ḳhvārī kā thā saare zamāne meñ ġharīv

qila vo lanka kā jo nā-qābiluttasḳhīr thā

jis pe nāzāñ apne dil meñ rāvan-e-be-pīr thā

the tilā.ī burj jis ke aur murassā bām-o-dar

jin kī choTī par na pahuñche koī murġh-e-tez-par

sauda-e-lāl-o-zamurrad thī vahāñ kī ḳhaak bhī

ik tilism aisā ki qāsir thā jahāñ aur ik bhī

ham ne aise dushmanoñ par fat.h paa.ī thī kabhī

apne hisse meñ bhī ye mojiz-numā.ī thī kabhī

aaj vo din hai ki ham us yaad ko taaza kareñ

rū-e-zebā-e-urūs-e-fat.h pur ġhāza kareñ

mil ke gaa.eñ raam ke gun dil meñ ho josh-e-surūr

qalb-e-sāfī maḳhzan-e-vahdat ho siina rashk-e-tūr

ye dasahrā ashra-e-ishrat hai apne vāste

ḳhāliq-e-kaunain kī ne.amat hai apne vāste

hai dasahra yaadgar-e-azmat-e-hindostan

hinduon ki ek qadimi fath-o-nusrat ka nishan

ek miTi si ye nishani daulat-o-iqbaal ki

yaad dilwati hai un ayyam-e-farruKH-fal ki

jab ki thi hum mein bhi aise zor-o-taqat ki numud

hech thi diwan roen tan ki jis se hast-o-bud

jab akele uTh khaDe hote the hum bahar-e-nabard

aur kar dete the apne dushmanon ko gard gard

dil mein himmat hath mein apne faqat shor-e-al-aman

bandh kar wo pul samundar ko kiya hum ne ubur

jis ko hairan dekh kar hain aaj bhi ahl-e-shuur

fauj-e-rawan la-tad thi reg-e-sahra ki tarah

aur umanD aai thi waqt-e-jang dariya ki tarah

rawan-e-KHunKHar aur wo koh-paikar is ke dew

jin ki KHun-KHwari ka tha sare zamane mein ghariw

qila wo lanka ka jo na-qabiluttasKHir tha

jis pe nazan apne dil mein rawan-e-be-pir tha

the tilai burj jis ke aur murassa baam-o-dar

jin ki choTi par na pahunche koi murgh-e-tez-par

sauda-e-lal-o-zamurrad thi wahan ki KHak bhi

ek tilism aisa ki qasir tha jahan aur ek bhi

hum ne aise dushmanon par fath pai thi kabhi

apne hisse mein bhi ye mojiz-numai thi kabhi

aaj wo din hai ki hum us yaad ko taza karen

ru-e-zeba-e-urus-e-fath pur ghaza karen

mil ke gaen ram ke gun dil mein ho josh-e-surur

qalb-e-safi maKHzan-e-wahdat ho sina rashk-e-tur

ye dasahra ashra-e-ishrat hai apne waste

KHaliq-e-kaunain ki neamat hai apne waste