dur is duniya se

duur is duniyā se ho koī jahāñ mere liye

is jahāñ meñ to nahīñ amn-o-amāñ mere liye

ik jahāñ jis meñ na ho fikr-o-taraddud kā hujūm

ik jahāñ jis meñ na ho shor-e-fuġhāñ mere liye

ik jahāñ jis meñ mujhe amn-o-farāġhat ho nasīb

zindagī jis meñ na ho bār-e-garāñ mere liye

ik jahāñ jis meñ na ho kuchh mā-o-tū kā imtiyāz

ik jahāñ āzād-e-qaid-e-īn-o-āñ mere liye

ik jahāñ jis meñ na ho ilm-o-ḳhirad kī dār-o-gīr

ho na jis meñ kāvish-e-sūd-o-ziyāñ mere liye

ik jahāñ jis meñ na ho buġhz-o-adāvat kā vajūd

aur mohabbat hī mohabbat ho jahāñ mere liye

ik jahāñ jis meñ mirā qaul-o-amal ho mo'atabar

har qadam par hoñ na jis meñ imtihāñ mere liye

ik jahāñ jis meñ na ho ishq-o-mohabbat ko zavāl

husn kā gulshan ho jis meñ be-ḳhizāñ mere liye

be-riyā.ī ho jahāñ ke basne vāloñ kā shi.ār

aur mohabbat meñ sadāqat ho jahāñ mere liye

zāhir-o-bātin jahāñ ke rahne vāloñ kā ho ek

hoñ na ḳhanjar āstīnoñ meñ jahāñ mere liye

zindagānī ho jahāñ ik ḳhvāb-e-shīrīñ kī misāl

har-nafas jis kā ho umr-e-jāvedāñ mere liye

jis kā har zarra ho ik duniyā-e-nā-paidā-kanār

jis kā har qatra ho bahr-e-be-karāñ mere liye

duur is duniyā se ho aisā jahāñ mere liye

is jahāñ meñ to nahīñ amn-o-amāñ mere liye

dur is duniya se ho koi jahan mere liye

is jahan mein to nahin amn-o-aman mere liye

ek jahan jis mein na ho fikr-o-taraddud ka hujum

ek jahan jis mein na ho shor-e-fughan mere liye

ek jahan jis mein mujhe amn-o-faraghat ho nasib

zindagi jis mein na ho bar-e-garan mere liye

ek jahan jis mein na ho kuchh ma-o-tu ka imtiyaz

ek jahan aazad-e-qaid-e-in-o-an mere liye

ek jahan jis mein na ho ilm-o-KHirad ki dar-o-gir

ho na jis mein kawish-e-sud-o-ziyan mere liye

ek jahan jis mein na ho bughz-o-adawat ka wajud

aur mohabbat hi mohabbat ho jahan mere liye

ek jahan jis mein mera qaul-o-amal ho mo'atabar

har qadam par hon na jis mein imtihan mere liye

ek jahan jis mein na ho ishq-o-mohabbat ko zawal

husn ka gulshan ho jis mein be-KHizan mere liye

be-riyai ho jahan ke basne walon ka shiar

aur mohabbat mein sadaqat ho jahan mere liye

zahir-o-baatin jahan ke rahne walon ka ho ek

hon na KHanjar aastinon mein jahan mere liye

zindagani ho jahan ek KHwab-e-shirin ki misal

har-nafas jis ka ho umr-e-jawedan mere liye

jis ka har zarra ho ek duniya-e-na-paida-kanar

jis ka har qatra ho bahr-e-be-karan mere liye

dur is duniya se ho aisa jahan mere liye

is jahan mein to nahin amn-o-aman mere liye