دور اس دنیا سے

دور اس دنیا سے ہو کوئی جہاں میرے لئے

اس جہاں میں تو نہیں امن و اماں میرے لئے

اک جہاں جس میں نہ ہو فکر و تردد کا ہجوم

اک جہاں جس میں نہ ہو شور فغاں میرے لئے

اک جہاں جس میں مجھے امن و فراغت ہو نصیب

زندگی جس میں نہ ہو بار گراں میرے لئے

اک جہاں جس میں نہ ہو کچھ ما و تو کا امتیاز

اک جہاں آزاد قید این و آں میرے لئے

اک جہاں جس میں نہ ہو علم و خرد کی دار و گیر

ہو نہ جس میں کاوش سود و زیاں میرے لئے

اک جہاں جس میں نہ ہو بغض و عداوت کا وجود

اور محبت ہی محبت ہو جہاں میرے لئے

اک جہاں جس میں مرا قول و عمل ہو معتبر

ہر قدم پر ہوں نہ جس میں امتحاں میرے لئے

اک جہاں جس میں نہ ہو عشق و محبت کو زوال

حسن کا گلشن ہو جس میں بے خزاں میرے لئے

بے ریائی ہو جہاں کے بسنے والوں کا شعار

اور محبت میں صداقت ہو جہاں میرے لئے

ظاہر و باطن جہاں کے رہنے والوں کا ہو ایک

ہوں نہ خنجر آستینوں میں جہاں میرے لئے

زندگانی ہو جہاں اک خواب شیریں کی مثال

ہر نفس جس کا ہو عمر جاوداں میرے لئے

جس کا ہر ذرہ ہو اک دنیائے نا پیدا کنار

جس کا ہر قطرہ ہو بحر بیکراں میرے لئے

دور اس دنیا سے ہو ایسا جہاں میرے لئے

اس جہاں میں تو نہیں امن و اماں میرے لئے