dur ki shahzadi

maiñ to paidā.ish hī se ik shahzādī thī

husn mire paikar meñ yuuñ dar aayā thā

siñghār ke ā.īne meñ jab maiñ jhāñktī to

ḳhud par shaidā hone lagtī

ḳhvāhish mere dil meñ paidā hone lagtī

ki merī puujā log kareñ

sar lā ke mire qadmoñ par dhareñ

lekin jab maiñ ne añgḌā.ī se husn pe apne naaz kiyā

mahsūs kiyā ki duniyā ko nārāz kiyā

thūkā nafrat se logoñ ne

aur mujh ko nā-hanjār kahā

badkār kahā

ik roz unhoñ ne bāloñ se mere afshāñ

merī nochī, noche kānoñ se āveze

bāñhoñ se chūḌī aur kaḌe

yuuñ hāthoñ kānoñ se mujh ko nañgī kar ke

ik zindāñ meñ Daal diyā

qumchī ke nishānoñ se merā shaffāf badan

niilā thā magar

maiñ ne na jhukāyā apnā sar

ki maiñ to paidā.ish hī se thī ik sultāna

jab thaam ke maiñ dīvār uThī

to tab bhī merī chaal meñ thā

pahlā sā vaqār-e-shāhāna

be-dāġh ik ā.īne ke gahre bātin meñ

apne raushan māthe pe likhe

asrār jo paḌhnā chāhtī maiñ

Dar jaatī maiñ

ye pūchhtī ḳhud se ''kaun hai tū?''

āmāq se merī ruuh ke ik āvāz ubhar kar ye kahtī

hai'' terī duniyā duur kahīñ''

us lamhe ke phailāv meñ maiñ Dar ke samā.ī rahtī thī

āñkhoñ se mirī ashkoñ kī dhārā bahtī thī

thā mujh ko yaqīñ ik roz mirā shohra sun kar

chaar ā.īna bāñdhe aa.egā

merā pujārī shahzāda

aur qaid se merī mujh ko chhuḌā le jā.egā

sūraj kī rath-gāḌī mere sar par se roz guzartī thī

āñgan meñ utarte saa.e ko maiñ ḳhauf se dekhā kartī thī

jab vo na mujhe lene aayā

to ik din maiñ ne maut se minnat kī ki aa

ai merī mohram! mujh meñ samā

vo merā kahnā maan ke mujh meñ yuuñ mastāna dar aa.ī

ki mere ḳhuun meñ chhan chhan ghuñghrū baj uTThe

maiñ jhuum uThī

aur chāñd ke daf par āñgan meñ shab bhar nāchī-

us sub.h unhoñ ne mere badan ko chaukhaT par murda paayā

main to paidaish hi se ek shahzadi thi

husn mere paikar mein yun dar aaya tha

singhaar ke aaine mein jab main jhankti to

KHud par shaida hone lagti

KHwahish mere dil mein paida hone lagti

ki meri puja log karen

sar la ke mere qadmon par dharen

lekin jab main ne angDai se husn pe apne naz kiya

mahsus kiya ki duniya ko naraaz kiya

thuka nafrat se logon ne

aur mujh ko na-hanjar kaha

badkar kaha

ek roz unhon ne baalon se mere afshan

meri nochi, noche kanon se aaweze

banhon se chuDi aur kaDe

yun hathon kanon se mujh ko nangi kar ke

ek zindan mein Dal diya

qumchi ke nishanon se mera shaffaf badan

nila tha magar

main ne na jhukaya apna sar

ki main to paidaish hi se thi ek sultana

jab tham ke main diwar uThi

to tab bhi meri chaal mein tha

pahla sa waqar-e-shahana

be-dagh ek aaine ke gahre baatin mein

apne raushan mathe pe likhe

asrar jo paDhna chahti main

Dar jati main

ye puchhti KHud se kaun hai tu?

aamaq se meri ruh ke ek aawaz ubhar kar ye kahti

hai teri duniya dur kahin

us lamhe ke phailaw mein main Dar ke samai rahti thi

aankhon se meri ashkon ki dhaara bahti thi

tha mujh ko yaqin ek roz mera shohra sun kar

chaar aaina bandhe aaega

mera pujari shahzada

aur qaid se meri mujh ko chhuDa le jaega

suraj ki rath-gaDi mere sar par se roz guzarti thi

aangan mein utarte sae ko main KHauf se dekha karti thi

jab wo na mujhe lene aaya

to ek din main ne maut se minnat ki ki aa

ai meri mohram! mujh mein sama

wo mera kahna man ke mujh mein yun mastana dar aai

ki mere KHun mein chhan chhan ghunghru baj uTThe

main jhum uThi

aur chand ke daf par aangan mein shab bhar nachi-

us subh unhon ne mere badan ko chaukhaT par murda paya