dusra janam

āfrīnash samay Daal diije ḳhudāyā

badan meñ tanavvo kī hairat-garī

merī maurūsiyat kī jaḌoñ meñ har ik saañs letī ikaa.ī ke ḳhaliyoñ kī miTTī bane

riiḌh kī markazī jāliyoñ meñ ajā.ib-kadoñ kā ḳhazāna chhupe

mere hāthoñ pe bhaTke hue rāh-gīroñ kī manzil kā naqsha bane

aur āñkhoñ kī in putliyoñ meñ tilismī charāġhoñ kā jañgal base

apnī āñkhoñ kī is raushnī se zamīñ kī tahoñ ko farozāñ karūñ

aur fāqa-kashoñ kī zamīnoñ meñ gehūñ kī sūrat uguuñ

be-vatan kashtiyoñ ke muhājir qabīloñ kā māñjhī banūñ

sard parbat kī tīkhī havāoñ ko sahte makīnoñ kā sūraj banūñ

aur azal se guphāoñ ke tārīk manzar meñ pahlī shuāoñ kā muzhda banūñ

haDDiyāñ noch khāte hue devtāoñ ke sīnoñ meñ paltī havas kā safāyā karūñ

khurdure paañv vāloñ ke paañv tale

maḳhmalīñ sabz sapne bichhātī huī ghaas kā ek rasta banūñ

ye jo mumkin na ho to mirī ḳhaak se chand girte makānoñ kī dīvār ko hī uThā dījiye

merī miTTī se maskan banā dījiye

aafrinash samay Dal dije KHudaya

badan mein tanawwo ki hairat-gari

meri maurusiyat ki jaDon mein har ek sans leti ikai ke KHaliyon ki miTTi bane

riDh ki markazi jaliyon mein ajaib-kadon ka KHazana chhupe

mere hathon pe bhaTke hue rah-giron ki manzil ka naqsha bane

aur aankhon ki in putliyon mein tilismi charaghon ka jangal base

apni aankhon ki is raushni se zamin ki tahon ko farozan karun

aur faqa-kashon ki zaminon mein gehun ki surat ugun

be-watan kashtiyon ke muhajir qabilon ka manjhi banun

sard parbat ki tikhi hawaon ko sahte makinon ka suraj banun

aur azal se guphaon ke tarik manzar mein pahli shuaon ka muzhda banun

haDDiyan noch khate hue dewtaon ke sinon mein palti hawas ka safaya karun

khurdure panw walon ke panw tale

maKHmalin sabz sapne bichhati hui ghas ka ek rasta banun

ye jo mumkin na ho to meri KHak se chand girte makanon ki diwar ko hi uTha dijiye

meri miTTi se maskan bana dijiye