دوسرا جنم

یہ جنم میں نے ملاقات میں گزار دیا ہے

وقت کے دیوتا نے

مجھے زندگی جینے کا کہا لیکن

وہ نہیں جانتا بنجر زندگی کو جینا

مجھ جیسے بکھرے لوگوں کے

بس میں نہیں

دن بھر ندی کے کنارے کھڑے ہو کر

سوچنا کب سارا پانی اپنی منزل

کو پہنچے گا اور میں ندی کے

اس پار کسی ایسے انسان سے ملوں گا

جو میری بنجر زندگی میں

محبت کی فصل اگائے

خدا پہاڑوں پر بیٹھ کر میرا

تماشا دیکھتا رہتا ہے

شاید مجھے اب دوسرے جنم کا

انتظار کرنا چاہیے

یا شاید اپنے قلم سے بنجر زندگی کو

سیراب کرنے کی کوشش

میں خود کی انگلی پکڑے چلتا رہتا ہوں

ہر روز یہ شام میرے غم کا سوگ

مناتی ہے میرے ساتھ ٹیبل پر بیٹھ کر

بکھرے بالوں کے ساتھ وہ بھی

میری ملاقات کا انتظار کرتی ہے

دن ختم ہونے کے بعد کسی بیوہ کی طرح

غم زدہ ہو کر رک گیا ہے

وہ تھک چکا ہے ملاقات کے انتظار میں

رات اب میرے دوسرے جنم تک

صبح نہ کرنے کی ضد کر رہی ہے

ہوا میرے کانوں میں کہہ گئی ہے

مجھے اگلے جنم کی تیاری کرنی چاہیے

وہ ملاقات جو کبھی ہوئی ہی نہیں

اس نے مجھے کتنا تھکا دیا ہے