dusra janm

ye janm maiñ ne mulāqāt meñ guzār diyā hai

vaqt ke devtā ne

mujhe zindagī jiine kā kahā lekin

vo nahīñ jāntā banjar zindagī ko jiinā

mujh jaise bikhre logoñ ke

bas meñ nahīñ

din-bhar nadī ke kināre khaḌe ho kar

sochnā kab saarā paanī apnī manzil

ko pahuñchegā aur maiñ nadī ke

us paar kisī aise insān se milūñgā

jo merī banjar zindagī meñ

mohabbat kī fasl ugaa.e

ḳhudā pahāḌoñ par baiTh kar merā

tamāshā dekhtā rahtā hai

shāyad mujhe ab dūsre janm kā

intizār karnā chāhiye

yā shāyad apne qalam se banjar zindagī ko

sairāb karne kī koshish

meñ ḳhud kī unglī pakḌe chaltā rahtā huuñ

har roz ye shaam mere ġham kā sog

manātī hai mere saath Table par baiTh kar

bikhre bāloñ ke saath vo bhī

merī mulāqāt kā intizār kartī hai

din ḳhatm hone ke baa'd kisī beva kī tarah

ġham-zada ho kar ruk gayā hai

vo thak chukā hai mulāqāt ke intizār meñ

raat ab mere dūsre janm tak

sub.h na karne kī zid kar rahī hai

havā mere kānoñ meñ kah ga.ī hai

mujhe agle janm kī tayyārī karnī chāhiye

vo mulāqāt jo kabhī huī hī nahīñ

us ne mujhe kitnā thakā diyā hai

ye janm main ne mulaqat mein guzar diya hai

waqt ke dewta ne

mujhe zindagi jine ka kaha lekin

wo nahin jaanta banjar zindagi ko jina

mujh jaise bikhre logon ke

bas mein nahin

din-bhar nadi ke kinare khaDe ho kar

sochna kab sara pani apni manzil

ko pahunchega aur main nadi ke

us par kisi aise insan se milunga

jo meri banjar zindagi mein

mohabbat ki fasl ugae

KHuda pahaDon par baiTh kar mera

tamasha dekhta rahta hai

shayad mujhe ab dusre janm ka

intizar karna chahiye

ya shayad apne qalam se banjar zindagi ko

sairab karne ki koshish

mein KHud ki ungli pakDe chalta rahta hun

har roz ye sham mere gham ka sog

manati hai mere sath Table par baiTh kar

bikhre baalon ke sath wo bhi

meri mulaqat ka intizar karti hai

din KHatm hone ke ba'd kisi bewa ki tarah

gham-zada ho kar ruk gaya hai

wo thak chuka hai mulaqat ke intizar mein

raat ab mere dusre janm tak

subh na karne ki zid kar rahi hai

hawa mere kanon mein kah gai hai

mujhe agle janm ki tayyari karni chahiye

wo mulaqat jo kabhi hui hi nahin

us ne mujhe kitna thaka diya hai