dusra jism

aaj pat-jhaḌ se jīvan meñ pahle-pahal

mere be-rang banjar badan kī zamīñ

kulbulāne lagī

zalzala jism meñ aisā barpā huā

sab dafīne ḳhazīne badan se ubalne lage

ābloñ aur chhāloñ ke ankur nikalne lage

laal piile hare baiñganī kattha.ī

zaḳhm ke phuul khilne lage

mere be-rang banjar badan kī zamīñ lahlahāne lagī

merī hairat baḌhāne lagī

merī miTTī bhī upjā.ū hai is qadar

maiñ ne sochā na thā

ik mahīne meñ

zaḳhmoñ kī chhe saat fasleñ kaTīñ

zindagī-bhar kī mahrūmiyoñ kā gila miT gayā

jism kī lahlahātī zamīñ dekh kar merā jī ḳhush huā

zaḳhm pahlā jo thā daaġh hai

dūsrā sūkhne ke marāhil meñ hai

tīsrā phuul kī tarah khiltā huā

aur chauthā kalī kī tarah hai chaTaktā huā

pāñchvāñ hū-bahū hai kalī

aur chhaTā kechue kī tarah

giilī miTTī meñ āhista se reñgtā hai abhī

sātvāñ kulbulātā hai zer-e-zamīñ

āTHvāñ hañs rahā hai falak par kahīñ

paañv jaise mire mor ke ho ga.e

haath phūloñ kā dasta huā

jism par daaġh ke chāñd taare chamakne lage

ai ḳhudā is navāzish pe terā bahut shukr hai

lekin ab

is badan kī zamīñ

aane vaalī na.ī fasl ke vāste tang paḌne lagī

mere mālik tū ab

ābloñ kī na.ī fasl ko rok de

yā mujhe dūsrā jism de

aaj pat-jhaD se jiwan mein pahle-pahal

mere be-rang banjar badan ki zamin

kulbulane lagi

zalzala jism mein aisa barpa hua

sab dafine KHazine badan se ubalne lage

aablon aur chhaalon ke ankur nikalne lage

lal pile hare baingani katthai

zaKHm ke phul khilne lage

mere be-rang banjar badan ki zamin lahlahane lagi

meri hairat baDhane lagi

meri miTTi bhi upjau hai is qadar

main ne socha na tha

ek mahine mein

zaKHmon ki chhe sat faslen kaTin

zindagi-bhar ki mahrumiyon ka gila miT gaya

jism ki lahlahati zamin dekh kar mera ji KHush hua

zaKHm pahla jo tha dagh hai

dusra sukhne ke marahil mein hai

tisra phul ki tarah khilta hua

aur chautha kali ki tarah hai chaTakta hua

panchwan hu-bahu hai kali

aur chhaTa kechue ki tarah

gili miTTi mein aahista se rengta hai abhi

satwan kulbulata hai zer-e-zamin

aaTHwan hans raha hai falak par kahin

panw jaise mere mor ke ho gae

hath phulon ka dasta hua

jism par dagh ke chand tare chamakne lage

ai KHuda is nawazish pe tera bahut shukr hai

lekin ab

is badan ki zamin

aane wali nai fasl ke waste tang paDne lagi

mere malik tu ab

aablon ki nai fasl ko rok de

ya mujhe dusra jism de