dusri raat

ye bhī raat guzar rahī he

kamre kī bikhrī chīzeñ sameTte hue

tumhāre jaane ke baad

tumhārī chahal-qadmiyāñ ghūmtī rahtī haiñ dil ke āñgan meñ

gūñjtī rahtī haiñ tumhārī sargoshiyāñ mere kānoñ meñ

bistar kī silvaTeñ muñh chiḌhāne lagtī haiñ

is baar cigarette ke jale hue TukḌoñ par mahsūs kartī huuñ

tumhāre hoñToñ kā lams

idhar-udhar bikhre hue tumhārī bātoñ ke Dher

chaa.e kī jhūTī pyāliyāñ

ek ek ko uThātī huuñ aur rakhtī jaatī huuñ

yādoñ kī almārī meñ

jis meñ pahle hī se maujūd haiñ

tumhārī muskurāhaToñ kī gaThriyāñ

balcony se jhāñktā huā chāñd

mahaktī huī raat kī raanī

kitnā kuchh sameTnā baaqī he abhī

mere māthe par tumhāre hoñToñ kā lams

tumhāre naam kā vird kartī huī dhaḌakne

thak kar chuur ho ga.ī huuñ ḳhud ko sameTte hue

aur āsmān par chamaktā huā āḳhirī sitāra bhī

is baar Duub jaanā chāhtā hai mere saath

tumhārī yaado ke be-karāñ samundar meñ

ye bhi raat guzar rahi he

kamre ki bikhri chizen sameTte hue

tumhaare jaane ke baad

tumhaari chahal-qadmiyan ghumti rahti hain dil ke aangan mein

gunjti rahti hain tumhaari sargoshiyan mere kanon mein

bistar ki silwaTen munh chiDhane lagti hain

is bar cigarette ke jale hue TukDon par mahsus karti hun

tumhaare honTon ka lams

idhar-udhar bikhre hue tumhaari baaton ke Dher

chae ki jhuTi pyaliyan

ek ek ko uThati hun aur rakhti jati hun

yaadon ki almari mein

jis mein pahle hi se maujud hain

tumhaari muskurahaTon ki gaThriyan

balcony se jhankta hua chand

mahakti hui raat ki rani

kitna kuchh sameTna baqi he abhi

mere mathe par tumhaare honTon ka lams

tumhaare nam ka wird karti hui dhaDakne

thak kar chur ho gai hun KHud ko sameTte hue

aur aasman par chamakta hua aaKHiri sitara bhi

is bar Dub jaana chahta hai mere sath

tumhaari yaado ke be-karan samundar mein