etiraf

ai dil-e-zinda sach batā ki tujhe

āḳhirash intizār kis kā hai

kaun sī sub.h terī nazroñ meñ

ho sakī sub.h-e-intiḳhāb kabhī

kaun sā lamha tere āñgan meñ

lamha-e-jāvedāñ nazar aayā

kis kiran ne tire lahū ko chunā

kab havā ne tarāsh liiñ rāheñ

kin nigāhoñ ne tujh ko parkhā hai

kin salīboñ ne terā qad naapā

kab tirā naġhma jān-e-mahfil thā

kab tire saaya meñ humā aayā

kab tirī zulf kā bharam TuuTā

phir tujhe shikva kyoñ rahā ki tujhe

zindagī raas aa sakī na kabhī

tū ne kab zindagī se ulfat kī

kab use marham-e-vafā jaanā

kab fazāoñ meñ tū ne ras gholā

har taraf talḳhiyoñ ke rishte haiñ

tū ne kab un kā zā.iqa chhoḌā

ai dil-e-zinda sach batā ki tujhe

ḳhaar rahnā hai yūñhī rāhoñ meñ

zindagī ke jahannamoñ se pare

apnī jannat banānā hai ki nahīñ

apne ḳhūñ-gashta rāh-dāroñ meñ

ḳhirman-e-dil jalānā hai ki nahīñ

apne ehsās kī kasauTī par

zarb kaarī lagānā hai ki nahīñ

apne bujhte hue charāġhoñ ko

rāh-e-ulfat dikhānā hai ki nahīñ

aao raushan kareñ charāġh vahī

jin se duniyā ujaal leñ ik din

apne hāthoñ meñ vo ayāġh raheñ

rañg-e-mahfil nikhār leñ ik din

ai dil-e-zinda sach batā ki tujhe

āḳhirash intizār kis kā hai

ai dil-e-zinda sach bata ki tujhe

aaKHirash intizar kis ka hai

kaun si subh teri nazron mein

ho saki subh-e-intiKHab kabhi

kaun sa lamha tere aangan mein

lamha-e-jawedan nazar aaya

kis kiran ne tere lahu ko chuna

kab hawa ne tarash lin rahen

kin nigahon ne tujh ko parkha hai

kin salibon ne tera qad napa

kab tera naghma jaan-e-mahfil tha

kab tere saya mein huma aaya

kab teri zulf ka bharam TuTa

phir tujhe shikwa kyon raha ki tujhe

zindagi ras aa saki na kabhi

tu ne kab zindagi se ulfat ki

kab use marham-e-wafa jaana

kab fazaon mein tu ne ras ghola

har taraf talKHiyon ke rishte hain

tu ne kab un ka zaiqa chhoDa

ai dil-e-zinda sach bata ki tujhe

KHar rahna hai yunhi rahon mein

zindagi ke jahannamon se pare

apni jannat banana hai ki nahin

apne KHun-gashta rah-daron mein

KHirman-e-dil jalana hai ki nahin

apne ehsas ki kasauTi par

zarb kari lagana hai ki nahin

apne bujhte hue charaghon ko

rah-e-ulfat dikhana hai ki nahin

aao raushan karen charagh wahi

jin se duniya ujal len ek din

apne hathon mein wo ayagh rahen

rang-e-mahfil nikhaar len ek din

ai dil-e-zinda sach bata ki tujhe

aaKHirash intizar kis ka hai