etiraf-e-haqiqat

hasad-o-rashk adab kī nahīñ karte tashkīl

jo haqīqat ko chhupāte haiñ vo hote haiñ baḳhīl

mad.h-e-fankār to goyā hai baḌe-pan kī dalīl

is se hotī hai vasī.a-un-nazarī kī takmīl

e'tirāf apnī jagah husn hai taqsīr nahīñ

aap be-bahra hai jo mo'taqid-e-'mīr' nahīñ

nām-e-nāmī liyā jaatā hai ba-tāzīm us kā

bazm-e-urdu meñ na.ī tarz-e-suḳhan kā hai ḳhudā

us ko to 'ātish'-o-'saudā' ne kiyā hai sajda

'josh'-o-'iqbāl'-o-'jigar' us ke sanā-ḳhvāñ haiñ to kyā

e'tirāf apnī jagah husn hai taqsīr nahīñ

aap be-bahra hai jo mo'taqid-e-'mīr' nahīñ

rang har ik se judā shoḳhī-e-guftār ajiib

ḳhud se bezār magar apne taḳhayyul kā naqīb

'zauq' bhī zor lagāte rahe tā-umr ġharīb

na huā par na huā 'mīr' kā andāz nasīb

e'tirāf apnī jagah husn hai taqsīr nahīñ

aap be-bahra hai jo mo'taqid-e-'mīr' nahīñ

'mīr' sab kā dil-o-dīda hai ba-qaul-e-'nāsiḳh'

'mīr' ḳhud apnā qasīda hai ba-qaul-e-'nāsiḳh'

'mīr' to ik gul-e-chīda hai ba-qaul-e-'nāsiḳh'

'ġhālib' apnā ye aqīda hai ba-qaul-e-'nāsiḳh'

e'tirāf apnī jagah husn hai taqsīr nahīñ

aap be-bahra hai jo mo'taqid-e-'mīr' nahīñ

hasad-o-rashk adab ki nahin karte tashkil

jo haqiqat ko chhupate hain wo hote hain baKHil

madh-e-fankar to goya hai baDe-pan ki dalil

is se hoti hai wasia-un-nazari ki takmil

e'tiraf apni jagah husn hai taqsir nahin

aap be-bahra hai jo mo'taqid-e-'mir' nahin

nam-e-nami liya jata hai ba-tazim us ka

bazm-e-urdu mein nai tarz-e-suKHan ka hai KHuda

us ko to 'atish'-o-'sauda' ne kiya hai sajda

'josh'-o-'iqbaal'-o-'jigar' us ke sana-KHwan hain to kya

e'tiraf apni jagah husn hai taqsir nahin

aap be-bahra hai jo mo'taqid-e-'mir' nahin

rang har ek se juda shoKHi-e-guftar ajib

KHud se bezar magar apne taKHayyul ka naqib

'zauq' bhi zor lagate rahe ta-umr gharib

na hua par na hua 'mir' ka andaz nasib

e'tiraf apni jagah husn hai taqsir nahin

aap be-bahra hai jo mo'taqid-e-'mir' nahin

'mir' sab ka dil-o-dida hai ba-qaul-e-'nasiKH'

'mir' KHud apna qasida hai ba-qaul-e-'nasiKH'

'mir' to ek gul-e-chida hai ba-qaul-e-'nasiKH'

'ghaalib' apna ye aqida hai ba-qaul-e-'nasiKH'

e'tiraf apni jagah husn hai taqsir nahin

aap be-bahra hai jo mo'taqid-e-'mir' nahin