etiraf

jal bujhe āñkhoñ meñ ḳhvāboñ ke mahakte paikar

ab kahīñ koī sharāra hai na sho.ala na dhuāñ

kho ga.e vaqt kī pathrīlī guzargāhoñ par

chand be-nām tamannāoñ ke qadmoñ ke nishāñ

ek parchhā.īñ huuñ jis meñ na koī rañg na ruup

sirf ehsās ho tum jis kā koī naam nahīñ

maiñ bhī pā-basta huuñ hālāt kī zanjīroñ meñ

tum pe bhī ahd-e-farāmoshī kā ilzām nahīñ

mere ehsās pe bhī barf jamī hai jaise

aañch detā nahīñ jazbāt ko koī mausam

dhaḌkaneñ aaj tumhārī bhī haiñ be-lafz-o-bayāñ

ab barastī nahīñ dildār nazar se shabnam

maiñ bhī kuchh sūrat-e-hālāt se bargashta huuñ

tum bhī ho apne ḳhayālāt pe pachhtā.ī huī

maiñ ne bhī jaan liyā hai ki haqīqat kyā hai

tum bhī ḳhvāboñ se nazar aatī ho uktā.ī huī

jab na maiñ maiñ huuñ na tum tum ho to phir āñkhoñ meñ

ye girāñbār-e-ehsās-e-shanāsā.ī kyuuñ

baar ho jaañ pe to paimān-e-rifāqat kaisā

bojh huuñ dil pe to jazboñ kī pazīrā.ī kyuuñ

mujh ko yuuñ pyaar kī rusvā.iyāñ manzūr nahīñ

tum bhī is rishte pe ilzām na aane denā

merī sāñsoñ meñ na mahkegī tumhārī ḳhushbū

tum bhī hoñToñ pe mirā naam na aane denā

jal bujhe aankhon mein KHwabon ke mahakte paikar

ab kahin koi sharara hai na shoala na dhuan

kho gae waqt ki pathrili guzargahon par

chand be-nam tamannaon ke qadmon ke nishan

ek parchhain hun jis mein na koi rang na rup

sirf ehsas ho tum jis ka koi nam nahin

main bhi pa-basta hun haalat ki zanjiron mein

tum pe bhi ahd-e-faramoshi ka ilzam nahin

mere ehsas pe bhi barf jami hai jaise

aanch deta nahin jazbaat ko koi mausam

dhaDkanen aaj tumhaari bhi hain be-lafz-o-bayan

ab barasti nahin dildar nazar se shabnam

main bhi kuchh surat-e-haalat se bargashta hun

tum bhi ho apne KHayalat pe pachhtai hui

main ne bhi jaan liya hai ki haqiqat kya hai

tum bhi KHwabon se nazar aati ho uktai hui

jab na main main hun na tum tum ho to phir aankhon mein

ye giranbar-e-ehsas-e-shanasai kyun

bar ho jaan pe to paiman-e-rifaqat kaisa

bojh hun dil pe to jazbon ki pazirai kyun

mujh ko yun pyar ki ruswaiyan manzur nahin

tum bhi is rishte pe ilzam na aane dena

meri sanson mein na mahkegi tumhaari KHushbu

tum bhi honTon pe mera nam na aane dena