احساس فنا

رہ منزل میں ہم دشواریوں کا غم نہیں کرتے

گزر جاتے ہیں ہنس کر فکر پیچ و خم نہیں کرتے

اڑاتے ہو ہنسی وارفتگان کوئے وحشت کی

خرد مندو تمہیں تو ہم شریک غم نہیں کرتے

جمال قدس کی قربت بھی کتنی روح پرور ہے

کہ اس منزل میں اہل دل فنا کا غم نہیں کرتے

رہ منزل میں احساس فنا آغاز منزل ہے

عیاں ہر بوالہوس پر راز کیف و کم نہیں کرتے

کبھی افلاک کی رفعت کبھی ہے خاک کی پستی

گلہ پھر بھی ترا اے گردش پیہم نہیں کرتے

منیرؔ ایثار پر اپنے ہے تاریخ جنوں نازاں

متاع زندگی لٹنے کا ہم ماتم نہیں کرتے