ehsas ki zaban

tumhāre paas maiñ aaya thā aaj sahme hue

mujhe ye ḳhauf thā tum mujh se bad-gumāñ to nahīñ

magar tumhārī nazar ko thā intizār-e-shadīd

na jaane kab se nigāheñ bichhā.e baiThī thiiñ

mujhe bulāyā biThāyā bahut sī bāteñ kiiñ

tumhāre narm shagufta gulāb jaise lab

kuchh is adā se khule jaise ik kañval taaza

tumhāre āriz-o-ruḳhsār the tar-o-tāza

tumhāre lahje meñ ik dard thā tarannum thā

tumhārī bātoñ meñ amrit bhī thā hayāt-afzā

tumhāre hoñToñ se phūloñ kā ras Tapaktā thā

tumhārī zulf-e-pareshāñ bhī bā-salīqa thī

tumhārī surmagīñ āñkhoñ meñ diip jalne lage

ka.ī charāġh ba-nām-e-vafā sulagne lage

vo baat jo mire ehsās kī zabāñ thī kabhī

tumhāre sāmne vo baat maiñ ne kah dī hai

ye is liye ki maiñ apnā samajh ke kahtā huuñ

vagarna dil meñ bahut se haiñ zaḳhm poshīda

magar tumheñ na karūñgā kabhī maiñ ranjīda

tumhaare pas main aaya tha aaj sahme hue

mujhe ye KHauf tha tum mujh se bad-guman to nahin

magar tumhaari nazar ko tha intizar-e-shadid

na jaane kab se nigahen bichhae baiThi thin

mujhe bulaya biThaya bahut si baaten kin

tumhaare narm shagufta gulab jaise lab

kuchh is ada se khule jaise ek kanwal taza

tumhaare aariz-o-ruKHsar the tar-o-taza

tumhaare lahje mein ek dard tha tarannum tha

tumhaari baaton mein amrit bhi tha hayat-afza

tumhaare honTon se phulon ka ras Tapakta tha

tumhaari zulf-e-pareshan bhi ba-saliqa thi

tumhaari surmagin aankhon mein dip jalne lage

kai charagh ba-nam-e-wafa sulagne lage

wo baat jo mere ehsas ki zaban thi kabhi

tumhaare samne wo baat main ne kah di hai

ye is liye ki main apna samajh ke kahta hun

wagarna dil mein bahut se hain zaKHm poshida

magar tumhein na karunga kabhi main ranjida