ehsas

maiñ to shā.ir huuñ

bas tire husn ko ehsās banā rakkhā hai

varna mujh meñ mire kirdār meñ kyā rakkhā hai

rū-e-nāhīd kahūñ zohra-jabīñ kah Dālūñ

apne naġhmāt se nazmoñ se hasīñ kah Dālūñ

bar-zamīñ paikar-e-firdaus-e-barīñ kah Dālūñ

haram-e-dil meñ sanam-ḳhāna sajā rakkhā hai

tujh pe ḳhvāboñ ko ḳhayāloñ ko nichhāvar kar duuñ

tujhe shab-gīr banā duuñ sahar-āvar kar duuñ

dosh-e-mahtāb pe rakh duuñ sar-e-ḳhāvar kar duuñ

āgahī meñ tirā pindār chhupā rakkhā hai

tujh ko tamsīl kī tashbīh kī azmat bolūñ

ruuh kī tamkanat idrāk kī naḳhvat bolūñ

tujh ko afsāna kahūñ tujh ko haqīqat bolūñ

apnī duniyā ko zamāne se judā rakkhā hai

tujh pe qurbān arab aur ajam sadqe karūñ

tujh pe nāqūs-o-azāñ dair-o-haram sadqe karūñ

sabr kā vāsta e.ajāz kā dam sadqe karūñ

soz aur saaz ko siine meñ dabā rakkhā hai

tujh ko maslak kahūñ īmān kahūñ diin kahūñ

dil kahūñ jaan kahūñ zaat kī taskīn kahūñ

jo duā tere liye ho use āmīn kahūñ

fikr ko nāma-e-a.amāl pe lā rakkhā hai

varna mujh meñ mire kirdār meñ kyā rakkhā hai

bas tire husn ko ehsās banā rakkhā hai

main to shair hun

bas tere husn ko ehsas bana rakkha hai

warna mujh mein mere kirdar mein kya rakkha hai

ru-e-nahid kahun zohra-jabin kah Dalun

apne naghmat se nazmon se hasin kah Dalun

bar-zamin paikar-e-firdaus-e-barin kah Dalun

haram-e-dil mein sanam-KHana saja rakkha hai

tujh pe KHwabon ko KHayalon ko nichhawar kar dun

tujhe shab-gir bana dun sahar-awar kar dun

dosh-e-mahtab pe rakh dun sar-e-KHawar kar dun

aagahi mein tera pindar chhupa rakkha hai

tujh ko tamsil ki tashbih ki azmat bolun

ruh ki tamkanat idrak ki naKHwat bolun

tujh ko afsana kahun tujh ko haqiqat bolun

apni duniya ko zamane se juda rakkha hai

tujh pe qurban arab aur ajam sadqe karun

tujh pe naqus-o-azan dair-o-haram sadqe karun

sabr ka wasta eajaz ka dam sadqe karun

soz aur saz ko sine mein daba rakkha hai

tujh ko maslak kahun iman kahun din kahun

dil kahun jaan kahun zat ki taskin kahun

jo dua tere liye ho use aamin kahun

fikr ko nama-e-amal pe la rakkha hai

warna mujh mein mere kirdar mein kya rakkha hai

bas tere husn ko ehsas bana rakkha hai