ehtijaj

havā jab tak mire is jism kī dīvār ko

bosīda chhalnī kī tarah

sūrāḳh-dar-surāḳh kar letī nahīñ

maiñ saañs lene kī koī qīmat nahīñ dūñgā

ye āñdhī

jab talak ghar ke añdhere sard kone meñ

musalsal TimTimātī būḌhī battī ko

bujhā detī nahīñ

maiñ raushnī ke haath bai'at ke liye

apne ye sūkhe haath

uupar na uThā.ūñgā

nayā sūraj tulū' jab tak nahīñ hogā

maiñ galiyoñ āñganoñ

kachche makānoñ

shahr kī vīrān saḌkoñ

aur dīvāroñ pe tārīkī malūñgā

tīrgī phailāuñgā

sūraj nayā sūraj

tulū' jab tak nahīñ hogā

maiñ saare kosne

aur gāliyāñ

har sub.h havā ke dosh pe rakh kar

use paiġhām bhejūñgā

yahāñ jab log

tārīkī meñ ghuT ke mar rahe hoñge

hañsūñgā

kosne dūñgā

ki maiñ marne se pahle

ik dafa

bas ik dafa jī bhar ke jiinā chāhtā huuñ

maiñ ki jo sadiyoñ purāne ghar ke

tiira kamre meñ paidā huā thā

be-his-o-murda

siyah jism aur zaḳhmī ruuh ke hamrāh

magar is baar maiñ marne se pahle

hañste sūraj kī shu'ā'oñ meñ nahānā chāhtā huuñ

jis kī ḳhātir

shahr kī galiyoñ

makānoñ āñganoñ

saḌkoñ dīvāroñ par

maiñ tārīkī bichhātā huuñ

hawa jab tak mere is jism ki diwar ko

bosida chhalni ki tarah

suraKH-dar-suraKH kar leti nahin

main sans lene ki koi qimat nahin dunga

ye aandhi

jab talak ghar ke andhere sard kone mein

musalsal TimTimati buDhi batti ko

bujha deti nahin

main raushni ke hath bai'at ke liye

apne ye sukhe hath

upar na uThaunga

naya suraj tulu' jab tak nahin hoga

main galiyon aanganon

kachche makanon

shahr ki viran saDkon

aur diwaron pe tariki malunga

tirgi phailaunga

suraj naya suraj

tulu' jab tak nahin hoga

main sare kosne

aur galiyan

har subh hawa ke dosh pe rakh kar

use paigham bhejunga

yahan jab log

tariki mein ghuT ke mar rahe honge

hansunga

kosne dunga

ki main marne se pahle

ek dafa

bas ek dafa ji bhar ke jina chahta hun

main ki jo sadiyon purane ghar ke

tera kamre mein paida hua tha

be-his-o-murda

siyah jism aur zaKHmi ruh ke hamrah

magar is bar main marne se pahle

hanste suraj ki shu'a'on mein nahana chahta hun

jis ki KHatir

shahr ki galiyon

makanon aanganon

saDkon diwaron par

main tariki bichhata hun