احتساب

کہیں سکون سے بیٹھیں

اور یہ سوچیں

کہ جو ہو چکا ہے اب تک

یہ جو زخموں کا سلسلہ ہے اندر تک

اس میں اپنا دخل کتنا ہے

کتنا اپنا حصہ ہے

کس قدر اپنی ذات شامل ہے

کیا یہی زندگی کا حاصل ہے

اب تلک جو ملا ہے مجھے

کیا بس اس قدر ہی ملنا تھا

یہ جو زخموں سے خون رستا ہے

جسم بے جان ہو جاتا ہے

نور آنکھوں سے کم سا ہوتا جاتا ہے

انگلیوں میں کپکپی سی ہوتی ہے

پیر بھی ڈگمگانے لگتے ہیں

اپنے اندر یہ زہر کب پھیلا

جو بدن میں آگ بن کے بہتا ہے

یہ تیر

کس طرف سے آیا تھا

اور کس نے کھینچ کر چلایا تھا

جو بصارت میں گڑ گیا ایسے

سارے منظر

لہو میں ڈوب گئے