عید کا دن

عید کا دن ہے زمانے بھر پہ چھائی ہے بہار

ہے زمیں سے آسماں تک اک فضائے خوش گوار

یہ وہ دن ہے جو سکون دل قرار جان ہے

یہ وہ دن ہے جو بہار حسرت و ارمان ہے

ہجر کی کلفت مٹا دیتا ہے دل سے یوم عید

آرزو کے گل کھلا دیتا ہے دل سے یوم عید

عشق کی محفل سجانے کے لئے ہے یوم عید

آتش فرقت بجھانے کے لئے ہے یوم عید

تازگیٔ دل بہار زندگانی عید ہے

اے خوشا روزے کہ روز شادمانی عید ہے

کیف دیدار او سرور والہانہ عید ہے

ہے پیام وصل ملنے کا بہانہ عید ہے

عید کا دن اک پیام عیش کی تمہید ہے

جس کو ہو دیدار اے شاہدؔ اسی کی عید ہے