ek aam si laDki

vo ek aam sī laḌkī hai dekh kar jis ko

na jaane kyuuñ mujhe aisā ḳhayāl aatā hai

ki us ke hañsne kā andāz ye batātā hai

huī nahīñ hai ġham-e-dil se rasm-o-rāh abhī

paḌī nahīñ hai koī choT abhī rag-e-jāñ par

kisī nigāh se uljhī nahīñ nigāh abhī

vo ek aam sī laḌkī ik aisā jazba hai

milī nahīñ jise alfāz meñ panāh abhī

vo ek aam sī laḌkī hai jaise chhā.ī huī

mire javān ḳhayāloñ pe be-ḳhudī kī tarah

ḳhayāl aatā hai ik phuul banñe vaalī hai

vo kam-sinī jo hai muñh-band sī kalī kī tarah

jo rañg ban ke hai mahbūs us ke paikar meñ

vo bū-e-husn to phailegī raushnī kī tarah

vo ek aam sī laḌkī hai jis ke saada nuqūsh

chamak uTTheñge mohabbat kī sard aahoñ se

jahāñ pe phuul to kyā dil bujhe hue hoñge

guzarne vaalī hai vo in hasīn rāhoñ se

abhī to ḳhair se ma.asūmiyat Tapaktī hai

magar sharāb bhī Tapkegī un nigāhoñ se

vo ek aam sī laḌkī hai jis ke baare meñ

na jaane zehn meñ aate haiñ kyuuñ ḳhayāl ka.ī

magar baḌe hī tahayyur se aaj subah ke vaqt

sunī hai maiñ ne mohalle meñ ek baat na.ī

guzishta shab ko vahī ek aam sī laḌkī

ḳhud apne ghar ke mulāzim ke saath bhaag ga.ī

wo ek aam si laDki hai dekh kar jis ko

na jaane kyun mujhe aisa KHayal aata hai

ki us ke hansne ka andaz ye batata hai

hui nahin hai gham-e-dil se rasm-o-rah abhi

paDi nahin hai koi choT abhi rag-e-jaan par

kisi nigah se uljhi nahin nigah abhi

wo ek aam si laDki ek aisa jazba hai

mili nahin jise alfaz mein panah abhi

wo ek aam si laDki hai jaise chhai hui

mere jawan KHayalon pe be-KHudi ki tarah

KHayal aata hai ek phul banne wali hai

wo kam-sini jo hai munh-band si kali ki tarah

jo rang ban ke hai mahbus us ke paikar mein

wo bu-e-husn to phailegi raushni ki tarah

wo ek aam si laDki hai jis ke sada nuqush

chamak uTThenge mohabbat ki sard aahon se

jahan pe phul to kya dil bujhe hue honge

guzarne wali hai wo in hasin rahon se

abhi to KHair se masumiyat Tapakti hai

magar sharab bhi Tapkegi un nigahon se

wo ek aam si laDki hai jis ke bare mein

na jaane zehn mein aate hain kyun KHayal kai

magar baDe hi tahayyur se aaj subah ke waqt

suni hai main ne mohalle mein ek baat nai

guzishta shab ko wahi ek aam si laDki

KHud apne ghar ke mulazim ke sath bhag gai