ek achanak maut ka nauha

ba-zāhir ye lagtā hai

us malgajī sub.h ko sab sahāroñ ne jaise

achānak tirā saath chhoḌā

sahar ne zamīñ par qadam jab rakhā

to achānak zamīñ bevafā ho ga.ī

ubhartā huā āftāb

ek hī nā-gahāñ laġhzish-e-pā se yuuñ laḌkhaḌāyā

ki maġhrib ke pātāl meñ muñh ke bal jā samāyā

achānak farishte kafan sā.ebāñ kī tarah taan kar

āsmānoñ se utre

guloñ kī mahak kī jagah daf.atan bū-e-kāfūr kī sard-mehrī ne le lī

shajar ke badan se na.ī koñpaloñ kī bajā.e ḳhizāñ phuuT niklī

ba-zāhir ye lagtā hai

lekin bhalā hādsa ek-dam kab huā hai

bahut din se is sar-ba-mahar ātishīñ raaz kā guñg fiita

ḳhamoshī se jaltā chalā jā rahā thā

fanā ke garajte hue ābshāroñ ke uupar tanā

rassiyoñ kā ye pul

ek muddat se galtā jā rahā thā

ba-zahir ye lagta hai

us malgaji subh ko sab sahaaron ne jaise

achanak tera sath chhoDa

sahar ne zamin par qadam jab rakha

to achanak zamin bewafa ho gai

ubharta hua aaftab

ek hi na-gahan laghzish-e-pa se yun laDkhaDaya

ki maghrib ke patal mein munh ke bal ja samaya

achanak farishte kafan saeban ki tarah tan kar

aasmanon se utre

gulon ki mahak ki jagah dafatan bu-e-kafur ki sard-mehri ne le li

shajar ke badan se nai konpalon ki bajae KHizan phuT nikli

ba-zahir ye lagta hai

lekin bhala hadsa ek-dam kab hua hai

bahut din se is sar-ba-mahar aatishin raaz ka gung fita

KHamoshi se jalta chala ja raha tha

fana ke garajte hue aabshaaron ke upar tana

rassiyon ka ye pul

ek muddat se galta ja raha tha