ek alamat

ghaas se bach ke chalo ret ko gulzār kaho

narm kaliyoñ pe chaḌhā do ġham-e-daurāñ ke ġhilāf

ḳhud ko dil thaam ke murġhān-e-giraftār kaho

raat ko us ke tabassum se lipaT kar so jaao

sub.h uTTho to use shāhid-e-bāzār kaho

zehn kyā chiiz hai jazbe kī haqīqat kyā hai

farsh par baiTh ke tablīġh ke ash.ār kaho

isī raftār se chaltā hai jahān-e-guzarāñ

inhī qadmoñ pe zamāne ke qadam uThte haiñ

koī ainak se dikhātā hai to ham dekhte haiñ

koī kāñdhoñ pe uThātā hai to ham uThte haiñ

ek raqqāsa-e-tannāz kī mahfil hai jahāñ

kabhī aate haiñ bhatīje kabhī am uThte haiñ

kabhī ik gosha-e-tārīk ke vīrāne meñ

kisī jugnū ke chamakne pe fuġhāñ hotī hai

kabhī is marhamat-e-ḳhās kā andāza nahīñ

kabhī do buuñd chhalakne pe fuġhāñ hotī hai

kabhī manzil ke tasavvur se jigar jalte haiñ

kabhī sahrā meñ bhaTakne pe fuġhāñ hotī hai

ham ne is chor ko sīnoñ meñ dabā rakkhā hai

ham isī chor ke ḳhatre se pareshān bhī haiñ

kaun samjhegā ki is sat.h-e-ḳhush-āvāz ke ba.ad

usī Thahre hue tālāb meñ tūfān bhī haiñ

bhaa.ī kī aañkh ke kāñTe pe nazar hai sab kī

devtā bhī haiñ isī bazm meñ insān bhī haiñ

ḳhatt-e-sartān se aatī hai millar kī āvāz

aur america ke bāzār meñ kho jaatī hai

jaais kī fikr ne ta.amīr kyā hai jis ko

vo zamīñ hasrat-e-me.amār meñ kho jaatī hai

kabhī manTo kā qalam ban ke dahaktī hai hayāt

kabhī sarmā.e kī talvār meñ kho jaatī hai

har payambar pe hañsā hai ye zamāna lekin

har payambar ne jhukā.ī hai zamāne kī jabīñ

apne ham-asr se ḳhā.if na ho ai vaqt kī aañch

is kī miTTī meñ sitāroñ kā dhuāñ hai ki nahīñ

isī miTTī se damaktī hai ye dhartī varna

durd-e-yak-sāġhar-e-ġhaflat hai che duniyā o che-dīñ

jism ke daaġh chhupānā to koī baat nahīñ

ruuh ke zaḳhm sulagte haiñ pas-e-parda-e-dil

sar chhupā lete ho tum ret meñ jis ke aage

isī tūfān meñ ghir jaate haiñ lākhoñ sāhil

ek raahī jise ehsās na hasrat na talab

ik safar jis meñ na manzil na surāġh-e-manzil

apnī hassās subuk naak se rūmāl haTāo

khaad meñ mahz ta.affun hī nahīñ ḳhez bhī hai

zauq darkār hai qatre ko guhar karne meñ

ye mai-e-nāb pur-asrār bhī hai tez bhī hai

kuchh to hai vaj.h-e-dil-āzārī-o-āhañg-o-satez

varna ye tab-e-ḳhush-aḳhlāq-o-kam-āmez bhī hai

shahr kī tīra-o-tārīk guzargāhoñ meñ

dāstāñ hogī to manTo kā qalam likkhegā

ziist qānūn o farāmīn-e-qafas ke aage

be-zabāñ hogī to manTo kā qalam likkhegā

is shifā-ḳhāna-e-aḳhlāq meñ nashtar ke qarīb

rag-e-jāñ hogī to manTo kā qalam likkhegā

gopī-nāth aur zafar-shāh ke jaise kirdār

kitnī gumnāmī meñ jī lete haiñ mar jaate haiñ

kis ne un āñkhoñ meñ vo ḳhvāb lahakte dekhe

jo is insānoñ ke jañgal meñ bikhar jaate haiñ

kis kā ā.īna hai mozel kī us ruuh kā aks

jis meñ maryam ke hasīñ naqsh nikhar jaate haiñ

ai na.e asr kī rag rag ko samajhne vaale

fahm-o-idrāk badī haiñ to badī terī hai

chand lamhoñ kī ḳhudā.ī hai rivāyāt ke saath

fan ke ādarsh kī rūh-e-abadī terī hai

maut ye sirf sa.ādat kī hai manTo kī nahīñ

ye shab-o-roz tire haiñ ye sadī terī hai

ghas se bach ke chalo ret ko gulzar kaho

narm kaliyon pe chaDha do gham-e-dauran ke ghilaf

KHud ko dil tham ke murghan-e-giraftar kaho

raat ko us ke tabassum se lipaT kar so jao

subh uTTho to use shahid-e-bazar kaho

zehn kya chiz hai jazbe ki haqiqat kya hai

farsh par baiTh ke tabligh ke ashaar kaho

isi raftar se chalta hai jahan-e-guzaran

inhi qadmon pe zamane ke qadam uThte hain

koi ainak se dikhata hai to hum dekhte hain

koi kandhon pe uThata hai to hum uThte hain

ek raqqasa-e-tannaz ki mahfil hai jahan

kabhi aate hain bhatije kabhi am uThte hain

kabhi ek gosha-e-tarik ke virane mein

kisi jugnu ke chamakne pe fughan hoti hai

kabhi is marhamat-e-KHas ka andaza nahin

kabhi do bund chhalakne pe fughan hoti hai

kabhi manzil ke tasawwur se jigar jalte hain

kabhi sahra mein bhaTakne pe fughan hoti hai

hum ne is chor ko sinon mein daba rakkha hai

hum isi chor ke KHatre se pareshan bhi hain

kaun samjhega ki is sath-e-KHush-awaz ke baad

usi Thahre hue talab mein tufan bhi hain

bhai ki aankh ke kanTe pe nazar hai sab ki

dewta bhi hain isi bazm mein insan bhi hain

KHatt-e-sartan se aati hai millar ki aawaz

aur america ke bazar mein kho jati hai

jais ki fikr ne tamir kya hai jis ko

wo zamin hasrat-e-meamar mein kho jati hai

kabhi manTo ka qalam ban ke dahakti hai hayat

kabhi sarmae ki talwar mein kho jati hai

har payambar pe hansa hai ye zamana lekin

har payambar ne jhukai hai zamane ki jabin

apne ham-asr se KHaif na ho ai waqt ki aanch

is ki miTTi mein sitaron ka dhuan hai ki nahin

isi miTTi se damakti hai ye dharti warna

durd-e-yak-saghar-e-ghaflat hai che duniya o che-din

jism ke dagh chhupana to koi baat nahin

ruh ke zaKHm sulagte hain pas-e-parda-e-dil

sar chhupa lete ho tum ret mein jis ke aage

isi tufan mein ghir jate hain lakhon sahil

ek rahi jise ehsas na hasrat na talab

ek safar jis mein na manzil na suragh-e-manzil

apni hassas subuk nak se rumal haTao

khad mein mahz taffun hi nahin KHez bhi hai

zauq darkar hai qatre ko guhar karne mein

ye mai-e-nab pur-asrar bhi hai tez bhi hai

kuchh to hai wajh-e-dil-azari-o-ahang-o-satez

warna ye tab-e-KHush-aKHlaq-o-kam-amez bhi hai

shahr ki tira-o-tarik guzargahon mein

dastan hogi to manTo ka qalam likkhega

zist qanun o faramin-e-qafas ke aage

be-zaban hogi to manTo ka qalam likkhega

is shifa-KHana-e-aKHlaq mein nashtar ke qarib

rag-e-jaan hogi to manTo ka qalam likkhega

gopi-nath aur zafar-shah ke jaise kirdar

kitni gumnami mein ji lete hain mar jate hain

kis ne un aankhon mein wo KHwab lahakte dekhe

jo is insanon ke jangal mein bikhar jate hain

kis ka aaina hai mozel ki us ruh ka aks

jis mein maryam ke hasin naqsh nikhar jate hain

ai nae asr ki rag rag ko samajhne wale

fahm-o-idrak badi hain to badi teri hai

chand lamhon ki KHudai hai riwayat ke sath

fan ke aadarsh ki ruh-e-abadi teri hai

maut ye sirf saadat ki hai manTo ki nahin

ye shab-o-roz tere hain ye sadi teri hai